CCC I SDKK TA INOUGURA NAN EKSPOSISHON DI KA’I ORGEL MINIATURA.

CCC I SDKK TA INOUGURA NAN EKSPOSISHON DI KA’I ORGEL MINIATURA.

 

Durante un enkuentro hopi animá Sentro Kultural Kòrsou (CCC) huntu ku Sentro di Detenshon i Korekshon Kòrsou (SDKK) a inougurá nan eksposishon di Ka’i Orgel Miniatura traha for di material desechabel dor di klientenan di SDKK. Durante e apertura a konta ku presensia di tantu Minister di Hustisia, señor Quincy Girigorie, komo Minister di Enseñansa, Siensia, Kultura & Deporte, señora Marilyn Alcalá-Wallé ku a hiba algun palabra. 

 

E proyekto Ka’i Orgel Miniatura ta un inisiativa ku a nanse for di e organisashon di Sentro Kultural Kòrsou, ku den kuadro di aña di Ka’i Orgel, kier a duna su kontribushon pa promové nos Ka’i Orgel den komunidat. Danki na su diferente partnernan entre otro Sentro di Detenshon i Korekshon Kòrsou (SDKK), Kas di Kultura i Fundashon Museo di Ka’i Orgel i Refineria Isla di Kòrsou, e proyekto aki a bira realidat.

 

E eksposishon di Ka’i Orgel Miniatura lo ta habrí pa públiko durante e periodo di 27 pa 29 di sèptèmber di 9’or di mainta pa 4’or di atardi.  E eksposishon ta situá den e Ouditorio di Sentro Kultural Kòrosu situa na Koniginnelaan den Emmastad. Entrada ta gratis.

 

Di tur e Ka’i Orgel Miniatura ku a keda produsí, un komishon kalifiká lo bai premiá e tresnan ku mas a destaká huntu ku esun ku nòmber mas original. E premiashon aki lo tuma lugá den luna di òktober próksimo.

 

Sentro Kultural Kòrsou kier a gradisí tantu gerensia i personal di SDKK, komo tambe Fundashon Kas di Kultura I Fundashon Museo di Kai Orgel pa nan aporte i nan balioso koperashon den e proyekto aki. Por ultimo i mas importante un danki na tur e klientenan ku a partisipá den e proyekto di Ka’i Orgel Miniatura.

 

Sentro Kultural Kòrsou pa medio di esaki ke invitá henter komunidat pa nan pasa atmirá e obranan ku klientenan di nos Sentro di Detenshon i Korekshon a traha. 

 

This site uses Akismet to reduce spam. Learn how your comment data is processed.

%d bloggers like this: