Advertisements

Ta un bèrgwensa ku ta usa preteksto infantil pa no aprobá un lei ku ta duna Parlamento e outoridat pa drenta den NV-nan i fundashonnan di Gobièrnu pa medio di Kontrolaria General

Ta un bèrgwensa ku ta usa preteksto infantil pa no aprobá un lei ku ta duna Parlamento e outoridat pa drenta den NV-nan i fundashonnan di Gobièrnu pa medio di Kontrolaria General

 

Awe despues di 588 dia, Presidente di Parlamento a konvoká tratamentu di e inisiativa di lei riba Kontrolaria General (KG) entrega do r di frakshon di MFK, esaki ta djis pa pueblo sa kon malu nos Parlamento ta wòrdu presidí.

 

Lamentablemente ku un biaha mas por a tuma nota den Parlamento di Kòrsou, ku debí ku ta un inisiativa di Lei ku frakshon di MFK a presentá, algun kolega di koalishon ta bini ku mil i un preteksto pa trata na “kraak af” e inisiativa di lei, kaminda e lei aki hustamente pa duna Parlamento pa medio di (KG) un outoridat bon balansá pa drenta den entidatnan di Gobièrnu ku ta risibí supsidio di Gobièrnu òf kaminda ku Gobièrnu tin akshonnan den un kompania.

 

MFK a hasi uso di eksperensia di huristanan di taya riba tereno estatal pa traha e kambio di lei aki. Ta apénas dos artíkulo ta kambia den e lei aki di KG. Anto pa e kambionan simpel aki, mas ainda frakshon di MFK a inkluí tur lokual ku Raad van Advies (RvA) a konsehá den e proposishon di lei aki.

 

Nos a ripará ku kasi ningun di e miembronan ku a hiba palabra awe, no a referí na e konseho di RvA, kual tabata un konseho hopi positivo relashoná ku e kambio di lei aki. Na lugá ku e miembronan di Parlamento di Kòrsou bai tras di e konseho di RvA, nan a bai filosofia riba kartanan i interkambio entre frakshon di MFK i KG.

 

E parlamentarionan ku ta sostené koalishon a tene duru na e kartanan di KG i no ta wak kon frakshon di MFK a desbaratá tur e lokual nan ku KG a trese dilanti. Pa frakshon di MFK ta un falta di rèspèt di parti di KG ku ta manda un karta pa Parlamento i ta pidi pa no trata e lei aki.

 

Frakshon di MFK te hasta a kumpli ku lokual ku RvA a indiká, esta ku mester a skucha miembronan di direktiva di KG. Skucha no ta nifiká ku bo mester ta di akuerdo ku KG. Asina mes frakshon di MFK a sinta na mesa na vários okashon ku direktiva di KG i tambe tabatin reunionnan entre e eksperto ku huntu ku frakshon di MFK a formulá e lei i empleadonan di KG tantu personal komo por eskrito.

 

Ta bon pa indiká ku KG a bisa den su karta fecha di 25 di mei 2018, ku promé ku aña 2018 kaba, nan lo presentá ku un kambio di lei mas integral. Awe ya nos ta kasi un aña i mei despues i KG no por presentá lokual ku nan a primintí nos di Parlamento.

 

Anto ainda tin miembronan ku kier skonde tras di KG. Ban serio den e pais aki.

 

Charles Cooper

Miembro di Parlamento 

Pa Frakshon di MFK

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: