Site icon KIKO TA PASANDO NOTISIA I INFORMASHON

Petishon pa reunion públiko di parlamento urgente ku e punto di agènda, Integridat di Minister di Enseñansa, Siensia, Kultura i Deporte no a keda honrá

Advertisements

Willemstad, 1 òktober 2019

                                                                                                   

Presidente di Parlamento
señor W. Millerson
Wilhelminaplein 4
Presente

Tópiko: Petishon pa reunion públiko di parlamento urgente ku e punto di agènda, Integridat di Minister di Enseñansa, Siensia, Kultura i Deporte no a keda honrá

 

Señor Presidente,

 

Suskrito, Lider di frakshon di MFK, ta aserka bo persona ku lo siguiente;

  

For di dia 24 di sèptèmber nos Frakshon a manda un petishon pa un reunion públiko urgente konforme artíkulo 64 insiso 4 di nos Reglamento di Orden, ku e punto di agènda Integridat di Minister di Enseñansa, Siensia, Kultura i Deporte.

 

Ku disgustu frakshon di MFK a tuma nota ku te awe no a yama e reunion en kuestion i tampoko bo a duna nos frakshon e motibu pakiko esaki no a sosodé. Mi kier rekordá bo ku konforme Reglamentu di Orden, nos tin e derechi di yama kualke reunion basta ku esaki ta kumpli ku e eksigensianan manera preskribí. Pero aparentemente a bira kustumber ku abo ta disidí ku ora MFK pidi un reunion esaki ta keda sin wòrdu yama manera Reglamentu di Orden ta stipulá. A yega dje leu ei ku a bira un kustumber ku nos reunionnan ta keda  yama despues di 84, 150 300. Ayera a trata un inisiativa di lei di frakshon di MFK despues di 588 dia.

 

Ta visibel ku ta un bòikòt tin kontra frakshonnan den oposishon ku e intenshon pa mata demokrasia den nos pais. Ta privilegiá frakshonnan ku ta sostené koalishon, pa nan si tur kos ta posibel, miéntras ku Reglamentu di Orden no ta hasi deskriminashon entre di ningun frakshon den Parlamento. Ta tur sorto di “novum”tin ta sosodé ku bo aprobashon i ku ningun hende no por hasi nada paso ta PAR, MAN i PIN tin e batuta den nan man i nan ta disidí ta kon nan ta bai hèndel ku demokrasia den nos pais.Esei ta motibu pa nos kana e kaminda pa asina esnan ku ta responsabel pa e “waarborgfunctie” atendé ku e forma di trapa riba demokrasia i pa salvaguardá esaki.

 

Ta inaseptabel ku tin violashonnan grave di leinan ta pasa den nos pais i esnan ku a huramentá dilanti  di representante di Rei ku nan ta bai salbaguardiá nos leinan i nos areglo di estado ta violá esaki sin ku nan tin ku karga ku ningun klase di konsekuensia.

 

Komo Presidente di Parlamento nos ta ferwagt ku bo persona lo salbaguardiá i tene bo na reglanan manera ta preskribí den artíkulo 7 di nos Reglamentu di Orden. Pero nos ta konstatá ku ta bo ku ta e persona ku mester yama reunion nan konforme e Reglamentu di Orden, ta demostrá ku bo tambe ta hasi mal uso di bo poder komo presidente di Parlamento i ta trapa riba derechinan demokrátiko, ku ta ankra den nos Areglo di Estado.

 

Sinseramente frakshon di MFK ta konstatá ku nos no por konta mas riba nada pa loke ta trata trato igual pa un i tur manera bo mes a skirbi den bo karta di ougùstùs 2017, ora frakshon di MFK a puntra bo persona komo presidente ta kon abo lo a bai hiba bo maneho. Bo kontesta tabata ku lo bo kumpli kabalmente ku e Reglamentu di Orden.

 

Lamentablemente frakshon di MFK ta konstatá todo lo kontrario i ku di bo parti bo no ta mustra niun klase di rèspèt pa frakshon di MFK. Ta mas kla ku di dia ku frakshon di MFK no tin ningun klase di derechi den e Parlamento ku ta wòrdu presidí pa bo persona.

 

Atentamente,

 

_____________________

Gilmar Pisas

Lider di Frakshon di MFK  

c.c. Gobernadó di Kòrsou      

 

    

Exit mobile version