Site icon KIKO TA PASANDO NOTISIA I INFORMASHON

Karta di presidente di Parlamento, relashoná ku petishon di frakshon di MFK pa lista di tur reunion ku ta pendiente pa wòrdu konvoká ta proba ku ta trapa riba derechi di frakshonnan den oposishon

Advertisements

Willemstad, 3 òktober 2019

                                                                                                   

Presidente di Parlamento
señor W. Millerson
Wilhelminaplein 4
Presente

Tópiko: Karta di presidente di Parlamento, relashoná ku petishon di frakshon di MFK pa lista di tur reunion ku ta pendiente pa wòrdu konvoká ta proba ku ta trapa riba derechi di frakshonnan den oposishon

 

Señor Presidente,

 

Na promé lugá nos ta gradisí bo ku despues di 32 dia bo a fasilitá frakshon di MFK un lista di tur reunionnan públiko i komishon sentral ku ta pendiente pa wòrdu konvoká.

 

Ku asombro nos a tuma nota riba loke frakshon di MFK a bin ta mustra ariba, ku bo persona komo presidente di Parlamento ta trapa riba derechinan di frakshonnan den oposishon.

 

For di bo propio lista nos ta konstatá ku te ku 24 di sèptèmber último, tin 15 reunionnan públiko ku ta pendiente pa wòrdu konvoká, 13 ta reunionnan pidi pa frakshonnan den oposishon di kual 9 di nan ta di frakshon di MFK.

 

Ku otro palabra 86% di e reunionnan pendiente pa wòrdu konvoká den Parlamento ta di frakshonnan den oposishon i 60% ta di frakshon di MFK.

 

Pa loke ta trata reunionnan di komishon sentral ku ta pendiente pa wòrdu konvoká, nos ta konstatá ku tin 15 reunion pendiente. Di kual 8 ta reunionnan pidi pa frakshonnan den oposishon i 4 di e 8 nan aki ta di frakshon di MFK.

 

Ku otro palabra 53% di e reunionnan pendiente pa wòrdu konvoká ta di frakshonnan den oposishon i 27% ta di frakshon di MFK.

  

Tin reunion públiko ku tin mas di 321 dia pidi i te ku awe bo persona no a konvoká esaki. Réunion di komishon sentral tin alrededor di 399 dia pendiente pa wòrdu konvoká.

 

For di bo propio listanan ta wòrdu prueba ku bo no ta funshoná di un forma ophetivo i neutral komo presidente di Parlamento, ku bo meta prinsipal ta pa trapa riba derechinan demokrátiko ku mester salvaguardá un bon funshonamentu di nos demokrasia i tambe bo ta mina e derechi di frakshonnan ku ta den oposishon.

 

Atentamente,

 

_____________________

Gilmar Pisas

Lider di Frakshon di MFK  

c.c. Gobernadó di Kòrsou          

 

Exit mobile version