Kiko ta e metanan real, ora den Komishon Sentral trata un konsepto di Proyekto di Lei?

Kiko ta e metanan real, ora den Komishon Sentral trata un konsepto di Proyekto di Lei?

Parlamentario Curtley Obispo durante su disertashon di dia 2 òktober 2019, a splika kiko e metanan real ta, ora trata un konsepto di Proyekto di Lei den un reunion di Komishon Sentral di Parlamento di Kòrsou. E la mustra ku tratamentu di un konsepto Proyekto di Lei ta tuma lugá konforme proseduranan di Reglamentu di Órden di Parlamento di Kòrsou. E Reglamento di Órden aprobá dia 10 òktober 2010 pa e promé Parlamento di Kòrsou. I tambe e Reglamento di Órden publiká pa medio di un Dekreto Nashonal dor di e promé Gobièrnu di Kòrsou riba 24 ougùstùs 2012. 

 

Parlamentario Curtley Obispo a indiká ku e no por kambia historia!. P’esei e la trese e siguiente puntonan pa dilanti a base di Reglamento di Órden di Parlamento di Kòrsou:

  1. Tur 21 miembro di Parlamento di Kòrsou ta invitá pa partisipá na e Komishon Sentral aki i duna nan aporte dor di hasi nan preguntanan i tambe hasi nan remarkenan pa loke ta trata e konsepto Proyekto di Lei. E reunion di Komishon Sentral aki ta den kuadro di entre otro artíkulonan 26, 27, 29, 30 i 31 di Reglamento di Órden;
  2. Meta final di e Komishon Sentral aki ta pa: (a) a base di artíkulo 30 di Reglamento di Órden hasi un investigashon preliminar di e konsepto di Proyekto di Lei promé ku Parlamento di Kòrsou den un Reunion Publiko por tuma un desishon di aprobashon si òf no. (b) a base di artíkulo 31 insiso 1, 2,3, di Reglamento di Órden, raportá un relato na Parlamento di Kòrsou. Tambe mester raportá bek na Gobernador di Kòrsou, ora ta trata un konsepto Proyekto di Lei di Gobièrnu di Kòrsou. 
  3. Maske Konseho di Konsulta (“Raad van Advies”) duna un lus bèrdè pa e konsepto Proyekto di Lei den su konseho, Parlamento di Kòrsou mester hasi su propio investigashon preliminar di e konsepto di Proyekto di Lei a base di artíkulo 30 di Reglamento di Órden;
  4. Den un relato di Komishon Sentral ta bai remarkenan i preguntanan di e miembronan di Parlamento di Kòrsou presente ku a hiba palabra den e reunion aki. E votashon na final di e reunion aki, ta pa aprobashon di un relato di e reunion (sea un relato preliminar, sea un relato definitivo òf sea un relato blanko). Un mayoria presente den e reunion aki ta tuma e desishon pa aprobá e tipo di relato. Relato preliminar òf definitivo ta wòrdu kontesta dor di Gobièrnu di Kòrsou òf parlamentarionan ora ta trata un inisiativa di lei.   
  5. Pues den un reunion di Komishon Sentral di Parlamento di Kòrsou no ta vota pro òf kontra pa aprobashon di e konsepto di Proyekto di Lei. Esaki ta únikamente posibel den un Reunion Publiko di Parlamento di Kòrsou, despues ku Komishon Sentral a aprobá i tambe duna un relato definitivo di e konsepto di Proyekto di Lei!

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: