Konmemorashon Fusilamentu di General en Hefe Manuel Carel Piar

Konmemorashon Fusilamentu di General en Hefe Manuel Carel Piar

 

Gobièrnu di Kòrsou i Fundashon General Manuel Carel Piar ta invitá Pueblo di Kòrsou na Plaza Piar dia 16 di òktober 2019 pa 17.00 na konmemorashon di 202 aña di fusilamentu di General Manuel Carel Piar na Agostura, Benezuela. Manuel Carel Piar a nase na Kòrsou dia 28 di aprel 1774. Yu di Maria Isabel Gomez i Fernando Alonso Piar. Te ku su 10 aña el a biba na Otrobanda den bisendario di Rifwaterstraat. Na aña 1797 Piar ta partisipá na e promé movimentu independentista bou di Manual Gual i José Maria España kontra Spañonan na La Guaira, Benesuela. Na 1798, despues di huí di Benesuela, Piar ta kordiná huída di katibunan pa medio di barku den besindario di Rif. Komo miembro di milisia di defensa di Kòrsou, Piar na 1804 ta partisipá banda di Luis Brion na e bataya di Pueblo di Kòrsou rondó di Roodeweg kontra invasornan Inglés. Despues di 3 siman di konfrontashon Kòrsou ta sali viktorioso i Pueblo ta deklará e dia ei komo ‘Dia di Viktoria’. Inglesnan di nan parti ta duna Kòrsou e apodo “The Idomable Island”, rekonosiendo asina nan derota. Na dos otro okashon Piar a konfrontá Inglésnan, e.o. na Dein, kaminda tambe ta sali viktorioso.  Na 1807, Piar ta aparesé na Haiti komo Kapitan de barku di guera bou di Presidente Alexandre Pétion. Piar ta di regreso na Benesuela na 1810 komo komandante di barku di guera. E ta tuma parti na diferente bataya naval. Den e periodo aki tambe e ta pone base di loke lo a bira e flota di guera bou di komando di Atmiral en Hefe Luis Brion. Bou di Francisco de Mirando na 1811 Piar ta sirbí ku rango di Kapitán. Huntu ku Santiago Marino na 1811 Piar ta partisipá na un invashon di kosta oriental di Benesuela for di Trinidad. Na 1816, Piar ta derotá Spañonan komandá pa General Francisco Tomás Morales na el Juncal. Esaki ta un di su tantísimo viktorianan. Dia 11 di aprel 1817 Piar ta derotá Spañonan na San Felix, seyando asina liberashon definitivo di e parti Oriental di Benesuela. Despues di e gran logro aki ku tabata un di su tantísimo hazañanan, Piar ta haña su mes konfrontá ku un Konseho di Guera ku ta sentensi’é na morto dia 15 di òktober 1817 debí na su konfrontashonnan ku Simon Bolívar. E diskurso di òrden, ku ta den man di presidente di Fundashon Piar, tin komo título: “Brion-Tula-Piar; Paralelo Perfekto”. Pueblo di Kòrsou ta keda invitá pa bin rindi honor na un di su mas grandi héroenan.

 

Kòrsou, 8 di òktober 2019.                                                                      Pacheco Domacassé

                                                                                                            Presidente Fundashon Piar

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: