Dia di Outonomia 2019

Dia di Outonomia 2019

Geplaatst op 9 Òktober 2019 dor di Ministerio di Asuntunan General i Promé Minister

Un Kòrsou ku ta krea i produsí ta un Kòrsou eksitoso!

Dia di Outonomia 2019, lo ta enfoká riba fortalesé i promové e espiritu kreativo i produktivo di nos isla, nos ekonomia oraño, den kuadro di fortifikashon i konstrukshon di nos nashon. Djòin komersiantenan, lidernan den bario, artistanan lokal i suidadanonan den sentro di suidat pa un atardi ameno.

Dia di Outonomia, aparte di ta un fecha históriko importante, ta un dia pa pone atenshon na e responsabilidat síviko ku e konsepto di outonomia ta nifiká pa kada suidadano di Kòrsou. Desaroyo i futuro di Kòrsou ta huntu nos komo suidadano tin ku duna esaki kontenido. E fecha di 10-10 ta un dia pa para ketu na e aspektonan produktivo, kreativo, inovativo i inklusivo ku ta uni nos komo pueblo i ku ta reflehá e responsabilidat propio pa nos dushi pais Kòrsou.

Riba e dia aki, manera a hasi e 2 añanan anterior, Gobièrnu di Kòrsou ta enfoká riba vários evento i enkuentro ku ta iluminá i enfatisá kon nos komo pueblo, komo individual i tambe den nos serkania i den nos bario, ta karga nos responsabilidat propio i ta kontribuí na nos pais den diferente forma.

 

Un Kòrsou ku ta produsí

Riba Brionplein nos lo tin un edishon spesial di Marshe Beth X 10-10. Banda di empresarionan chikí ku lo tei manera semper pa bende nan produktonan, lo tin algun bario ku stènt pa promové nan talento i eksperiensia úniko di bario na komunidat kompleto. Tur persona ta bon biní pa pasa sostené i siña mas di kon ekonomia oraño ta manifesta den barionan di Kòrsou.

Plenchi Konstruí Nashon

Manera anunsiá riba Dia di Bandera, Gobièrnu di Kòrsou lo bini ku un programa pa aña 2020-2021, esta e aña ku lo selebrá ku Kòrsou ta 10 aña un pais, pa reforsá konstrukshon di nos nashon i nos identidat kolektivo. Enfoke lo ta riba tres tema, esta:

  1. historianan kompartí . Kon nos ta duna realse na e simbolonan, selebrashonnan i istorianan ku nos ta konta, konmemorá i reflehá i ku nos kier traspasá pa siguiente generashon. E istorianan ku ta definí nos, ta definí nos nashon i ta definí nos futuro.
  2. balor kompartí. Kua ta e balornan kompartí ku ta sentral den nos kombibensha komo komunidat? Kua ta e prinsipionan ku ta forma base di kon nos kier trata nos ruman i bisiña, kon nos ta trata ku nos reglanan, kon nos ta komportá komo suidadano i kon nos ta trata ku nos rekursonan natural i material? Balornan kompartí ta duna kontenido na kiko ta kada suidadano su deber i responsabilidat síviko.
  3. vishon kompartí. Unda nos vishon kompartí ta topa otro, kiko ta e ingredientenan pa logra e desaroyo i vishon deseá i kua ta e areanan ku nos mester fortifiká pa realisá nos vishon kompartí? Por ehèmpel, e espiritu di inovashon, ko-kreashon i kolaborashon, koheshon sosial, konsiensia kultural, Resistensia (Resilience), ets.

Pa duna inisio na un kombersashon inklusivo i kolektivo, riba 10-10-19 lo tin un Pop-up Plenchi Konstruí Nashon, kaminda tur suidadano ku kier, por pasa i skibi nan kontesta òf aporte na e preguntanan relatá na e tres temanan. Lo invitá mandatarionan i otro personan den komunidat pa pasa duna nan aporte. Tur aporte lo ser konsiderá i lo yuda konseptualisá proyekto i ideanan pa e programa di Konstruí Nashon di 2020-2021.

Un Kòrsou ku ta krea 

Na tur dos banda di brüg lo tin yen aktividat. Krusa brüg drenta Punda lo bo topa ku ‘Arte den Kaya Grandi’ ku pintamentu, poesia i kuenta, müzik, shou, teater i baile. Bin kana den Punda i disfrutá di Arte den Kaya Grandi ku famia i amigunan.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: