Bon picheo i bon kuné a dominá den kontinuashon di torneo RBI Curaçao 2019

November 5, 2019 REDAKSHON

WILLEMSTAD – Un fin di siman di RBI Curaçao marka pa hopi wega di bon bisiña (empate) i tambe bon picheo di Manuela di Giants i Lourens di Pirates. Ya e temporada a pasa mitar kaba i Van Engelen Giants ketu bai ta domina e tabla di posihon i awor ku un marka di 5 gana, o pèrdí i 2 empatá. Tatu St. Michiel Astros komo Royal Scorpions tin nan bisa fiha si riba e lidernan. Weganan di fin di siman a ranka sali ku un wega pèrta i al final Sta. Maria Pirates i Firebirds Diamondbacks a hasi kos di bon ruman ku otro i wega a keda empatá 2-2. Pirates tabatin 6 hungadó ku 1 hit den e wega aki. Pa Diamondbacks, Edmond Jops i Jayden Janez a bai di 3-2. E siguiente wega tambe Sta. Rosa Indians i van Engelen Giants a tuma ehèmpel di e wega anterior i a keda empatá na 8-8. Esaki ta e di dos wega di temporada ku Giants ta empatá i ainda no a konosé derota den e aktual kampionato. Stephen Roozendal tabatin e mihó bate pa Indians bayendo di 3-2. Pa Giants, Beyonce Paulina a bai di 4-2. Finalmente djasabra den último wega si tabatin un ekipo ganadó i otro pèrdèdó. Royal Scorpions a Sali di porta dilanti ku un viktoria di 6-5 riba Marchena Reds. Picher ganador a resulta Jadon Gosepa miéntras ku Nazir Fernandez a bai di 2-2. Pa Reds, Hardleyon Thomasita a resultá e picher pèrdèdó miéntras ku 3 bateadó di Marchena a bai di 2-1, Sloop, Donazal i Kraal.

Djadumingu mainta tempran e ekipo di Va Engelen Giants a manda Egory Manuela riba montikulo, ta un di e prospektonan ku ta halando basta atenshon di organisashonnan di Liga Grandi. E no a desepshoná e scoutnan presente tampoko guiando su ekipo na un viktoria di 14-1 riba Firebirds Diamondbacks. El a resultá e picher ganador permitiendo 1 kareda riba 3 hit i poncha 9 bateadó. Beyonce Paulina a bai di 1-1 ku 1 tripel i 3 kareda anotá pa Giants. Picher pèrdèdó a resultá Jayden Janez i Yairo Juliana a bai di 2-1 pa D’Backs. Djadumingu Royal Scorpions ta bolbe hasi kos di pas i keda empatá ku St. Michiel Astros 5-5. Pa Scorpions Bjorn Louisa a bai di 1-1 i pa Astros Tuhedrik Rosa a bai di 4-2. Finalmente djadumingu den otro bon wega, Sta. Maria Pirates a blankea e ekipo di Marchena Reds 2-0. Picher ganador tabata Je-Andrick Lourens ku a permití solamente 1 hit. Mihó bate pa Pirates tabata Djenior Mogen di 3-3. Picher pèrdèdó tabata Gedion Baromeo i Joshua Leito a konektá e úniko hit di Reds. Lamentablemente e ekipo di Kwartier Yankees a kai for di e kampionato aktual di RBI Curaçao pa motibu ku a pèrdè nan di dos wega pa default. Esei ta pone ku outomátikamente segun regla e ekipo lo no por partisipá mas den temporada 2019. E kampionato ta kontinuá ku e otro 7 organisashonnan.

E kampionato di RBI Curaçao 2019 divishon Senior ta kontinuá fin di siman próksimo ku vários wega tantu djasabra komo djadumingu na Tio Daou Ballpark. Por sigui tur desaroyo di e kampionato via di e website nobo www.rbicuracao.com, unda por haña tur informashon, skema di wega, orario i resultadonan. RBI Curaçao tin su propio twitter account tambe bou di @Curacaorbi i ya manera sa kaba tin e página riba Facebook.

RBI Curaçao 2019 ta kai bou di ouspisio di Curaçao Baseball Development Foundation (CBDF) i kampionato ta bou di maneho di Fundashon pa Nan. Danki un biaha mas na MCB pa ta spònser prinsipal, Hensley Meulens i por último KNBSB.