Banda Bou Splash a saka kara di Kòrsou na Argentina 

Banda Bou Splash a saka kara di Kòrsou na Argentina 
Willemstad – E sinku atletanan di Banda Bou Splash ku a partisipá den un kompetensia internashonal di natashon artístiko (sinkronisá) na Argentina a regresá Kòrsou. Tur e atletanan a logra konkistá medayanan. Famia i simpatisantenan a risibí nan ku entusiasmo i ánimo na Hato.
Na Argentina e atletanan a partisipá siman pasa na e di 8 Argentina Open Artistic Swimming ku a tuma luga di 29 di òktober te ku 2 di novèmber. E atletanan di Banda Bou Splash mester a kompetí kontra kontrikantenan di paisnan di Europa, hinter kontinente merikano i Nieuw Zeeland. E hurado tabata konsistí di personan ku eksperensiá internashonal i ku a yega di husga atletanan na weganan olímpiko.
E sinku atletanan di Banda Bou Splash tur a sa di destaká den e diferente kategorianan. Aydinedd Tokaay a logra konkistá dos medaya di oro. Unu pa su solo i unu pa figura. Di-Johnaitis Sebastiana huntu ku Kevin Kevin Omoneukanrin a konkistá plata pa dueto miksto. Siegdeon Isidora huntu ku Favelle Johannes Maduro a konkistá oro ku nan dueto miksto.
Despues di nan yegada na Hato e atletanan a haña un sorpresa. A transportá e atletanan i nan famianan pa bándabou den un konvoi di fiesta. Na Groot Santa Martha unda e kas di Banda Bou Splash ta a sigui selebrá e logronan.
Coach Adria Koomen a deklará ku e kompetensiá tabata unu duru pero un bon eksperensiá pa e atletanan. Na Argentina nan a topa ku atletanan ku ta train shete biaha pa siman. Esakinan ta atletanan ku ta prepará pa kompetí na weganan olímpiko. Ku e atletanan di Kòrsou a logra tòg bini kas bek ku medaya ta demonstrá na kua nivel nan ta.
No tin masha tempu pa sosegá. Aki dos siman e atletanan di Banda Bou Splash mester kompetí atrobe. E biaha aki sí na Kòrsou mes.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: