Frakshon di MAN a entregá inisiativa di lei pa adaptashon di nos Kódigo Penal. 

Frakshon di MAN a entregá inisiativa di lei pa adaptashon di nos Kódigo Penal. 

 

Na Kòrsou nos konosé un situashon alarmante di kasonan di maltrato i/ òf violensia (relashonal). Hopi biaha e kasonan di maltrato ta tuma lugá den presensia di mucha. Esaki tin un impakto troumátiko i negativo riba bida i desaroyo di e mucha. Tratado Internashonal di Derechinan di Mucha ta papia tambe di protekshon di mucha kontra tur forma di maltrato i violensia.  Muchanan ku ta testigu di maltrato no solamente ta sufri konsekuensianan hopi troumátiko, e ta trese un sentido di insiguridat tambe serka nan. Esaki por sosodé ora e maltrato tuma lugá ku un deskonosí pero e ta aun mas impaktante ora e sosodé ku un mayor òf miembro di famia.

 

Nos tur por kòrda tambe e kaso, ku tabata sirkulá riba retnan sosial, kaminda dos hende muhé a maltratá/agredí un otro hende muhé formalmente dilanti un Sentro Pre Eskolar. Esaki a sosodé den presensia di muchanan menor di edat. E dos hende muhénan en kuestion a haña kondena i kastigu di prizòn kondishonal pa nan akto. E muchanan menor di edat a keda troumatisá. 

 

Aktualmente, segun artíkulo 2:277 di nos Kódigo Penal, bou di Título XX “Mishandeling”, ta ora un persona maltratá su yu, yu di kriansa, kasá, partner di bida, mayor òf empleado públiko, e ta haña un kastigu adishonal di un terser parti. Esta e ta haña un kastigu mas haltu. 

 

Lider di frakshon, señora Elsa Rozendal, kende ta “trekker” di e inisiativa di lei aki, ta di opinion ku e kastigu adishonal di un terser parti, mester konta tambe pa ora ku un kaso di maltrato tuma lugá den presensia di muchanan menor di edat. Aktualmente esaki nò ta e kaso. Ku e adaptashon aki, frakshon di MAN ke pa hasi hustisia na nos muchanan ku nò ta pidi pa nan haña nan mes den e situashon lamentabel di tin ku presensiá maltrato. 

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: