SPICH GEZAGHEBBER BONAIRE MASTERPLAN 2030

SPICH GEZAGHEBBER BONAIRE MASTERPLAN 2030

 

Kralendijk – Manera mi a kaba di ilustrá e tema sentral di e konferensia akí no ta un pasivo ‘kiko lo para di nos den futuro, si nos mas bien un aktivo ‘kua ta e futuro ku nos ke bira. Ku otro palabra: kon e komunidat Boneriano lo mester ta den 2030? Un pregunta ku ta konserní nos tur, i indudablemente nos tur tin nos mes ideanan tokante esei. Nos no ke laga koriente hiba nos, pero nos ke krea i ta e koriente.

P’esei mes mi ta haña mashá kontentu ku e organisashon a skohe pa envolví un i tur den kreashon di e Masterplan Bonaire 2030. Esaki ta e mesun aserkamentu ku Bestuurscollege a usa tambe pa desaroyá e programa di gobernashon aktual i ku a resultá nos mashá bon. 

Nos a risibí mas ku shen kontribushon for di tur sektor di komunidat. Ku rason, e programa di gobernashon ta karga e título: Di nos tur, dor di nos tur i pa nos tur. Esei mester konta tambe pa e masterplan den kua lo definí kon nos futuro konhunto lo ta. Huntu nos lo traha un diseño di e Boneiru di 2030.

E parti agradabel i a la bes e reto di e fase akí ta ku nos no tin mester di dominá nos mes. Bo por asta, i por fabor hasié, pensa out of the box durante e dianan benidero. Laga nos reta nos mes, e trata na alkansá lo máksimo. Den mi kaso por ehèmpel, lo ke mira den e siguiente dies añanan pobresa keda eradiká for di Boneiru. Kisas boso ta haña esei un soño irealisabel, pero lo mi no konsiderá mi un bon gezaghebber si mi no aspirá pa eradiká pobresa i realisá un partisipashon mas grandi di komunidat

Den mi Boneiru ideal, bienestar ta mas importante ku prosperidat. Mi no ta mira prosperidat ekonómiko komo un meta, sino mas bien komo un medio pa alsa bienestar. Ami tabata impresario, pues mi sa ku ta nesesario pa gana plaka pa por paga bo empleadonan i bo mes un salario hustu i bolbe hasi invershon.

 

Esei ta konta tambe pa nos komo komunidat: huntu nos mester por generá sufisiente entrada pa por paga pa fasilidatnan di enseñansa, salubridat, kaminda etc.  Ta esei ta e realidat den kua nos ta biba. Sinembargo, rikesa no ta únikamente un kuestion di plaka, pero prinsipalmente ta un kuestion di kon nos ta anda ku otro i ku nos isla. P’esei nos mester puntra nos mes: Nos ke un isla kaminda un i tur por lanta i krese den un ambiente sigur, salú i stimulante? 

Kaminda un i tur, inkluso e generashonnan despues di nos, tin oportunidat igual pa ta felis?

Kaminda nos ta anda ku otro di manera respetuoso?

Kaminda interes general no ta supordiná na nos interes propio?

Kaminda nos ta anda kuidadosamente ku nos naturalesa i medioambiente? 

Kaminda nos ta honra balor i normanan boneriano? 

Kaminda nos ta apresiá i kultivá nos propio kultura?

Kaminda nos ta aseptá otro manera nos ta?

Kaminda nos ta kuida nos kosuidadanonan vulnerabel?

Kaminda nos no ta kritiká otro, pero hustamente ta yuda alsa otro?

Kaminda polítiko i mandatarionan ta pone nan mes pa sirbi komunidat? 

 

Den poko palabra, nos ke un Boneiru ku huntu nos por ta orguyoso di dje?

Loke mi ke bisa ta: tribi soña na bos altu den e dianan benidero. No pensa di antemano ku algu no ta posibel i laga esei stroba bo. Unda tin boluntat tin un kaminda, i si no tin e kaminda nos ta trah’é. Konsiderá e masterplan akí ku nos ta desaroyando komo un enkargo na polítiko i mandatarionan pa realisá nos soño di nos tur huntu. I aki mi ke enfatisá e palabra huntu, simplemente pasobra uní nos ta para fuerte, i dividí nos ta kai.

Permití mi konkluí felisitando e organisadónan ku e programa sumamente interesante ku nan a prepará pa nos. Nan a logra haña un kantidat di oradó huntu ku ke kompartí nan historianan fasinante ku nos. Mi ta konvensí ku ta spera nos tres dia ku lo inspirá nos.

Foto: Deedee Seintje

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: