Kòrsou ta Kampeon di Softball Femenino di Sur Amerika 2019

Kòrsou ta Kampeon di Softball Femenino di Sur Amerika 2019

Geplaatst op 8 Novèmber 2019 dor di Ministerio di Enseñansa, Siensia, Kultura & Deporte

Gobièrnu di Kòrsou a duna rekonosementu na nos hóbennan femenino ku a titulá kampeon 2019.

WILLEMSTAD – Gobièrnu ta duna rekonosementu na nos atletanan ku a titulá kampeon di Softball Femenino di Sur Amerika pa aña 2019. Ku hopi orguyo nos Promé Minister sr. Eugene Rhuggenaath den kompania di henter e gabinete a felisitá tur e atletanan ku a sa di gana e premio máksimo riba dia 1 di novèmber 2019 den e kompleho deportivo di Sur di Guayaquil na Ecuador.

Minister enkargá ku deporte sra. Marilyn Alcalá-Wallé a invitá nos atletanan hubenil femenino serka konseho di Minister den fòrti pa asina gradisí nan pa a logra di titulá kampeon Sur Amerikano 2019. Tur e atletanan huntu ku nan ‘coach’ nan a keda kondekorá ku e ‘pin’ di bandera di pais Kòrsou komo apresio i gradisimentu pa nan aporte i representashon di nos nashon.

Nan a gana e selekshon di Brasil den 8  ‘inning’ ku un skor di 5 pa 4. E di 33 Torneo Sur Amerikano di Softball Femenino aki a keda organisá na Guayaquil, Ecuador kaminda vários selekshon di paisnan di Sur Amerika manera Colombia, Ecuador, Brasil, Peru, Panama i Chile a partisipá. Momentunan emoshonante pa nos selekshon ta e picheo di nos ‘Pitcher’ Leonella Elizabeth i bateo di nos tremendo Mishenou Marselia. Den e ramo deportivo aki tambe nos hóbennan ku a keda guiá pa nan dirigente i ‘coach’ nan (Balentina, Girigorie, Agatha, Matrona, Lourens, Angela, Hanst, Girigori) ku a sa di motivá i stimulá nan di un forma hopi positivo.

Gobièrnu di Kòrsou ta yama kada persona i/o organisashon ku ta entrená nos hóbennan un danki di kurason pa nan gran aporte na konstrukshon di nos hóbennan. Ta huntu nos tur ta logra un mihó nashon!

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: