Speshal pa studiantenan: ERASMUS+ Programma.

Speshal pa studiantenan: ERASMUS+ Programma.

Geplaatst op 16 November 2019 dor di Ministerio Enseñansa, Siensia, Kultura & Deporte

Willemstad – Paris. Minister di Enseñansa, Siensia, Kultura i Deporte sra. Marilyn Alcalá-Wallé ta riba mishon na Hulanda i Paris pa atendé asuntunan riba tereno di enseñansa, entrenamentu, hóben i deporte.

Un di e temanan ku sra. Alcalá-Wallé a atendé huntu ku Minister Plenipotensiario sr. Anthony Begina ta e asina yamá ‘ERASMUS+ Programma’ ku ta un programa di Union Europeo pa sostené akshonnan di e Erasmus Programa (EuRopean Community Action Scheme for the Mobility of University) ku ta kombiná tur e diferente skemanan den kuadro di edukashon di nos hóbennan.

E programa ta disponé di un presupuesto di aproksimadamente 16 mion Euro pa e periodo di 2014-2021 i ta duna mas ku 4 mion hende e oportunidat pa atkerí kompetensia riba e tereno personal, sosial, edukativo i profeshonal.

Durante su mishon Minister di Enseñansa sra. Alcalá-Wallé a tuma mas informashon tokante di e programa pa por brinda e kampo di enseñansa i edukashon na Kòrsou mas akseso na oportunidat i fondonan pa sigui optimalisá formashon di nos komunidat, manera formulá den e metanan di UNESCO pa sigui krea instrumento i oportunidatnan pa kada hende por desaroyá su mes na su máksimo potenshal. Den e kuadro aki dosentenan tambe ta haña e posibilidat, sea individual o den tim, pa haña oportunidat pa siña abilidatnan nobo. Pa studiantenan tambe tin e oportunidat pa hasi uso di proyektonan di interkambio i pasantia/stage pa amplia nan horizonte.

Organisashonnan ku ta operá riba tereno di enseñansa, kultura, estudio i hubentut tambe por entregá petishon pa proyektonan inovativo riba tereno di enseñansa pa risibí finansiamentu dor di e Komishon Europeo. Minister Alcalá-Wallé ta enkurashá tur esnan interesá pa keda pendiente pa e trayekto di sosten ku e Ministerio di Enseñansa, Siensia, Kultura i Deporte ta bai duna dentro di poko mas informashon na e kampo di enseñansa i edukashon pa hasi mas i mihó uso di e programa i oportunidatnan di Erasmus+ pa Kòrsou.

Keda pendiente pa mas informashon!