Prome Minister Evelyn Wever-Croes Aruba ta ganando confiansa di Hulanda bek: CONSEHO DI MINISTER DI REINO NO TA DUNA ‘AANWIJZING’ PASOBRA ARUBA TA CUMPLIENDO CU PALABRACIONNAN

Prome Minister Evelyn Wever-Croes

 

Aruba ta ganando confiansa di Hulanda bek:

CONSEHO DI MINISTER DI REINO NO TA DUNA ‘AANWIJZING’ PASOBRA ARUBA TA CUMPLIENDO CU PALABRACIONNAN

 

Na su yegada bek na Aruba, despues di algun dia intense di reunionnan na Hulanda, Prome Minister Evelyn Wever-Croes a tene un rueda di prensa den e sala di VIP na Aeropuerto Reina Beatrix. Prome Minister a duna un relato hopi amplio di e reunionnan na Hulanda y e motibo pa cua Conseho di Minister di Reino no a duna Aruba un ‘aanwijzing’. Prome Minister a mustra riba e pasonan cu Gabinete Wever-Croes a tuma y ta tumando pa cuminsa sania finasas di pais Aruba y cambia e rumbo cu Aruba tawata bayendo den dje. Y hunto mester a tuma pasonan duro pa pone Aruba bek riba e rumbo di finansas saludabel. Awo Aruba tin un Presupuesto 2020 cu un surplus di 0.5% of 29 miyon florin. Y nos a yega na unda cu Aruba por cuminsa paga y baha su debe. E aña aki nos debe lo cera na 4.323.59 miyon florin cu ta 74.6% di nos GDP y na aña 2020 ta premira di cera cu un debe 4.294,34 miyon florin cu ta 73.4% di nos GDP. 

 

“Esaki a duna e confiansa na Hulanda e ora pa no duna un ‘aanwijzing’ awor, pero e ta keda riba mesa te ora nos caba di entrega Presupuesto 2020. Mi ta hopi contento cu esaki pasobra nos por demostra cu nos mes por regla nos asuntonan sin tin mester di un ‘aanwijzing’. Minister Knops a accentua cu tin cosnan bon ta sosodiendo na Aruba riba tereno financiero, pero kier mira e Presupuesto 2020 wordo trata den Parlamento mas pronto posibel”.

 

Cu e decision di Hulanda pa no duna un ‘aanwijzing’, AWOR, ta duna Gobierno di Aruba espacio pa sigui cu e procedura di Presupuesto 2020 y momento cu esaki wordo aproba pa Parlamento y ta cumpli cu e normanan, e ‘aanwijzing’ lo wordo kita for di mesa definitivamente. Ta spera cu Parlamento lo trata esaki den januari 2020. 

 

Prome Minister a expresa su gratitud na prome luga na Dios pa e forsa y guia. Na coleganan lider di coalicion, sr. Ricardo y sr. Otmar, pa e confiansa pa nos a cera un coalicion y sigui traha den coalicion. Na coleganan minister pasobra ta tur ta para hunto den e lucha aki, tur ta haci sacrificio pa por logra e metanan financiero. Especialmente Prome Minister a gradici Minister di Finansa pa su vision y determinacion y na e consheronan, Directie Financien, DWJZ, DRH y den e caso aki especialmente sr. Nilo Swaen, cu su experiencia den atende cu e tema financiero riba nivel di Reino, ta yuda nos hopi. Na colega Minister Plenipotenciaro na Hulanda sr. Besaril pa su sosten na Hulanda den reunionan. Tame Prome Minister ta gradici Parlamentarionan, coleganan di nos partidonan di coalicion y tur sostenedor di e partidonan di coalicion pa e sosten.

 

Na pueblo di Aruba en general, Prome Minister ta accentua, “Danki pa boso sosten, oracion, palabranan di encurashamento. Honestamente mi por admiti cu tawata tin momentonan hopi dificil. Momentonan cu mi por a flakea, mi por a fada, mi a haya gana di ‘give up’, pero e mensahenan tawata inspira mi cada biaha di nobo. Danki di curason”. 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: