Intenshonnan di Gobièrnu pa ku transishon di Refineria Isla ta kana segun plan

Intenshonnan di Gobièrnu pa ku transishon di Refineria Isla ta kana segun plan

Geplaatst op 01 December 2019 dor di Ministerio Asuntunan General i Promé Minister

WILLEMSTAD – Gobièrnu di Kòrsou ta satisfecho ku resultado di e biahe di e tim di Refineria di Kòrsou (RdK) pa Venezuela, despues ku Gobièrnu – bou di liderazgo di Promé Minister Eugene Rhuggenaath – a duna mandato na RdK pa bai papia ku PDVSA. Esaki ku e propósito pa yega na palabrashonnan fiho pa ku e transishonnan nesesario di Refineria Isla den 2020. Durante di un kombersashon fruktífero ku a tuma lugá e wikènt aki, RdK i PDVSA a palabrá di ta dispuesto i lo traha huntu riba un periodo di transishon na momentu ku e kontrato aktual terminá dia 31 di desèmber 2019. Un ke otro awor aki mester keda formalisá.

Ta trata aki di un periodo di transishon di máksimo 1 aña ku e meta pa garantisá kontinuidat di operashon di nos refineria den e aña benidero, banda di e negosashonnan ku ta tumando lugá ku Grupo Klesch pa posibelmente operá nos Refineria mas pronto ku ta posibel. E periodo di 1 aña di transishon ta basá riba e kondishonnan di e eksonerashon nobo (special license) ku resientemente Kòrsou a risibí di “Office of Foreign Assets Control” (OFAC) di e departamentu di Finansas di gobièrnu di Merka, pa asina evitá kualke situashon kaminda Kòrsou tambe por keda sanshoná dor di Merka. Promé Minister Rhuggenaath personalmente a biaha pa Washington D.C. 4 dia despues ku a entregá e petishon pa eksonerashon pa medio di e lisensia aki dia 26 di sèptèmber, pa argumentá e nesesidat di periodo di transishon. Dia 20 di novèmber lastu aki, Gobièrnu di Kòrsou a risibí e notisia ku tin un lisensia ku ta habri espasio pa por papia di un transishon.

Entre otro a palabrá ku PdVSA ku e  periodo di transishon mester resultá den garantia di empleo pa empleadonan ku ta laborá na Refineria Isla entrante 1 yanüari 2020. Tambe e transishon mester enserá e pasonan nesesario pa hasi posibel ku ta re-inisiá trabounan di mantenshon ku kontratistanan. Den e kuadro aki PDVSA lo wak pa atendé ku tur debe lokal banda di garantisá pago di salario na empleado. Hopi importante den tur esaki ta ku a base di e lisensia ta posibel pa kuminsá laga krudo yega Kòrsou, kual atrobe ta na benefisio di suministro di kombustibel na komunidat pero tambe di e operashon na Bullenbaai i trabounan di Kompania di Tou Kòrsou (KTK). Durante di e periodo di transishon aki RdK, riba propio inisiativa, seguidamente lo konsiderá tambe e oportunidatnan pa kuminsá desaroyá terenonan den e área di e refineria ku na e momentunan aki no ta den uzo.

E palabrashonnan ku mester keda formalisá entre RdK i PDVSA pa medio di un kontrato, ta parti di e strategia di Gobièrnu, kaminda a bin ta para ketu na tur posibel senario ku por surgi den e proseso pa yega na un posibel operadó nobo pa refineria. Yega na un kontrato nobo ku PDVSA den kaso di un fase di transishon semper a forma parti di un di e posibel senarionan aki. Manera Promé Minister Rhuggenaath repetidamente a trese dilanti den media, Gobièrnu di Kòrsou lo keda ku e enfoke nesesario pa yega na e mihó resultado pa komunidat di Kòrsou ku énfasis riba kontinuidat di nos refineria, teniendo kuenta ku sanshonnan ku Merka a imponé riba PdVSA i tambe negosashon ku ta tumando lugá pa nos yega na un kontrato nobo pa operá nos refineria.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: