Repatriashon di 89 persona indokumentá ku a drenta Kòrsou na un forma ilegal resientemente

Repatriashon di 89 persona indokumentá ku a drenta Kòrsou na un forma ilegal resientemente

Geplaatst op 01 December 2019 dor di Ministerio Hustisia

Djasabra 30 di novèmber último, Kuerpo Polisial, huntu ku instansianan konserní, a kordiná un operashon di repatriashon di 89 persona indokumentá, ku a drenta Kòrsou resientemente for di Venezuela na un forma ilegal. E grupo a keda transportá 11:50 di mainta ku e kompania Conviasa i a aterisá sano i salvo djasabra mèrdia bèk na nan pais. E operashon a kana na un forma profeshonal, kaminda a tene debido kuenta ku trato korekto i e derechinan (humano) di e personanan konserní.

Despues ku durante di e último dos simannan, Wardakosta a interseptá tres lancha ku respektivamente 11, 44 i 42 persona di nashonalidat Venezolano a bordo ku a trata di drenta teritorio di Kòrsou di forma ilegal, e kantidat di persona ku tabata detené na Barak na Sentro di Detenshon i Korekshon Kòrsou (SDKK) a surpasá e kapasidat di e lokalidat. Despues di a konkluí ku e situashon na e baraknan no tabata unu humanitariamente korekto, a hasi un apelashon na Sentro di Kalamidat, ku a determiná un situashon di krísis.

Bou di guia di e sentro pa kalamidat a evaluá vários lokalidat na Kòrsou ku ta kumpli ku tur aspekto pa por hospedá un kantidat di persona indokumentá den un ambiente mas korekto, pa un periodo kòrtiku. Konsekutivamente djárason 27 di novèmber, a trasladá 46 hende hòmber pa e sala di ehersisio di ORV (Skol di Polis).

Ta importante pa informá ku despues di intersepshon di e botonan en kuestion a skucha i prosesá datonan di kada persona individualmente.

Un di e personanan detené a hasi apelashon riba artíkulo 3 di e tratado Europeo di derechonan humano, indikando konkretamente ku e tabata teme di wòrdu torturá si e regresá Venezuela. E persona aki, di akuerdo ku nos proseso di protekshon no a wòrdu repatriá.

Di e entrevistanan ku a tene ku e personanan aki por a konkluí ku ta trata di motibunan sosial ekonómiko ku a pone ku nan a bandoná nan pais en buska di un mihó lugá pa nan traha i kuida nan famia na Venezuela.

Nos leinan lokal i internashonal sinembargo no ta ekstendé pèrmit di estadia na personanan ku pa motibunan sosial ekonómiko drenta nos pais kontra di nos leinan.

Konsekuentemente a hasi trámitenan pa e personanan konserní regresá nan pais mas pronto posibel. Promé ku nan regreso a splika e proseso na kada persona individualmente i kada unu a risibí un dokumento ku e splikashon di e motibu di nan regreso por eskrito. En total 29 persona di e sekso femenino i 60 persona di sekso maskulino a biaha bèk pa nan pais.

“Collectieve uitzetting”/ Ekspulshon kolektivo

Algun abogado i otro personanan den komunidat ta usando e konsepto di Ekspulshon kolektivo en konekshon ku repatriashon di e personanan menshoná. Minister ta refutá ku esaki tabata e kaso den e repatriashon.

E prohibishon ekspresá den e konsepto di prohibishon di “Ekspulshon kolektivo” ta na momentu ku no hasi un evaluashon individual di kada persona, pero traha solamente un dokumento a base di kua ta ekspulsá un kantidat di persona.

Den e kaso aki manera menshoná anteriormente e úniko punto ku e personanan aki tabatin en komun ta e echo ku nan a drenta huntu hasiendo uso di e mesun medio; esta “lancha”, pero kada unu a keda evaluá individualmente.

Den e añanan ku a pasa Kòrsou a duna pèrmit na alrededor di 8000 Venezolano ku di forma legal kier a establesé nan mes den nos pais. Esaki ta muestra ku komo pais nos brasanan ta habrí pa siudadanonan di otro nashonalidat ku ke establesé nan mes na Kòrsou, sinembargo komo pais nos no por enkurashá entrada ilegal di personanan den nos teritorio.