Elsa Rozendal di MAN: Ta un bèrgwensa nashonal loke a pasa dia 10 di desèmber último ora ku un situashon di káos a surgi na momentu ku Banko Sentral a pone moratorio riba Girobank den e luna di mas drùk di aña. 

Elsa Rozendal di MAN: Ta un bèrgwensa nashonal loke a pasa dia 10 di desèmber último ora ku un situashon di káos a surgi na momentu ku Banko Sentral a pone moratorio riba Girobank den e luna di mas drùk di aña. 

 

Segun Rozendal a surgi situashonnan lamentabel i bergonsoso kaminda por ehèmpel un mama ku a bai kumpra kuminda pa su yunan a keda pará na kaha di supermerkado sin por a paga. Un hende a bai kue gasolin i si e nò tabata tin sèn cash pa paga, e lo a keda na pia. E penshonado ku nò por a lanta sèn. E kontratista ku nò por a paga trahadónan. E señora ku ta lora man i mester a kumpra produktonan pa traha ayaka i nò por a hasi esaki i a kai atras ku pedidonan. E empresario ku nò por a bende artíkulonan ku klientenan ku mester a paga ku pasje di Girobank. 

 

E Parlamentario a splika ku ta vários persona di Aruba i Hulanda a aserká e parlamentario pa puntra kiko tabata pasando na Kòrsou. Imágennan di video a bai viral di situashonnan di tenshon na filialnan di Girobank. 

 

Segun Rozendal e loke a pasa ku Girobank hamas i nunka por ripití den nos pais. Ta p’esei e parlamentario a urgi e Minister di Finansa p’e tuma e akshonnan nesesario i rápidamente pa evitá ku algu doloroso asina por ripití den nos pais. Ta inkorekto ku ta pone un banko 6 aña largu bou di supervishon i maneho di Banko Sentral, ta inbertí mas ku 270 mion di komunidat drn Girobank, pa despues yega na un desenlase asina aki. 

Último tempu Banko Sentral ta den hopi lus negativo i Mester re-establesé konfiansa bèk den e instituto aki. 

 

Durante e reunion di Parlamento, Parlamentario Rozendal a hasi e minister mas ku 30 pregunta.

 

  1. Ta usual ku Banko Sentral ta tene un banko bou fi supervishon tantu aña asina?
  2. Dikon nò a atendé e problemátika di Girobank mas tempran?
  3. Na 2013 a bisa ku dentro di 2 aña lo a resolvé e problema di Girobank. Dikon e a dura 6 aña? 
  4. Kiko tabata e plan di Banko Sentral pa fortifiká i solushoná e retonan di Girobank? 
  5. Konta pará ku e ‘bestuurlijke aansprakelijkheid’ durante e periodo di 2013 te ku aworakí di tantu e bestuurders di Girobank i di Banko Sentral. 
  6. Dikon Banko sentral na 2013 na momentu ku a pone Girobank bou di supervishon no a stel e bestuurdersnan di Girobank aansprakelijk for di e tempu ei. ?
  7. Awor ku e situashon di Girobank ta mustra ku nò tin salida, Ken ta responsabel i tin ku paga e sèn ku Banko Sentral i APC a hinka den Girobank? Ta e pagadó di belasting i e penshonado finalmente tin ku paga esaki?
  8. Manera ta ser bisá PDVSA tin un montante grandi depositá na Giro, supongamos ku no a pone moratorio i PDVSA a bin tuma su sèn, kuantu porshento di klientenan lo por a haña un garantia di 10 mil florin?
  9. Kiko ta responsabilidat di Gobièrnu pa ku Girobank?
    6..Kua ta e akshonnan ku ta keda tumá dor di Gobièrnu pa garantisá sektor bankario na Kòrsou?
  10. Kua akshonnan ta keda tumá pa evitá ku klientenan ku ta depositá nan sènnan na un banko, nò ta pèrdè esaki?
  11. Kiko Gobièrnu ta bai hasi òf ta hasiendo pa evitá klientenan di Girobank no sigui bira víktima di e situashon di Girobank?
  12. Kiko ta bai para di e trahadónan di Girobank?
  13. Kon ta bai garantisá salario di trahadónan ku e entidat ku nan ta traha p’e tin kuenta solamente na Giro?
  14. Na kua Instituto finansiero mas nos ta premirá problema i kiko ta bai hasi p’e situashon nò eskalá?
  15. Gobièrnu tabata sa ku lo a bai pone moratorio na Girobank? Si e kontesta ta si, kiko Gobièrnu a hasi pa por a evitá e chaos ku a ser kreá na momentu di e moratorio?
  16. Kiko a pasa entre e komunikado ku Banko Sentral a saka dia 28 di òktober último kaminda nan ta indiká ku klientenan di Girobank por ta trankil i por sigui hasi transakshonnan normal, i e moratorio di 10 di desèmber último?
  17. Mi ke un timeline di for di 2013 ku Banko Sentral a pone un noodregeling riba Girobank, di tur e akshonnan ku a keda tumá i dor di ken.
  18. Kiko ta e lès ku nos por siña for di e kaso aki pa futuro?
  19. Pa kiko Banko Sentral nò a skohe otro momento pa pone e moratorio? Mirando ku desèmber ta e luna mas drùk di aña?
  20. Ki konsekuensia e akshon aki di Banko Sentral tin riba nos klima di invershon?
  21. Tin invershonista ku a ekspresá nan preokupashon na Gobièrnu pa ku e situashon ku a surgi aki?
  22. Ki konsekuensia e akshon aki di Banko Sentral tin riba nos ekonomia?
  23. Kiko a trigger e desishon di Banko Sentral pa pone e moratorio 13 di desèmber último?
  24. Kuantu sèn Girobank a kosta Banko Sentral, Gobièrnu i komunidat?
  25. Kiko a kousa e défisit grandi den Girobank?
  26. Kiko Banko Sentral por a hasi pa evitá e pèrdida di plaka grandi aki?
  27. Kiko ta bai pasa ku esnan responsabel pa e debakel aki?
  28. Ki dia Gobièrnu ta tuma akshon kontra esnan responsabel pa e debakel aki?
  29. Ta e intenshon pa invertí mas sèn den Girobank?
  30. Kiko ta e benefisio i konsekuensia di hinka of keda sin hinka e mas sèn den Girobank
  31. Tin un business case pa esaki? 
  32. Ta bèrdat ku Banko Sentral a haña un atvertensia di Caribbean Financial Action Taskforce pa nò a hasi sufisiente komo reguladó di e institutonan finansiero pa loke ta “non- compliance” tokante labamentu di plaka? 
  33. Kiko a hasi ku e atvertensia i ki pasonan a tuma? 

This site uses Akismet to reduce spam. Learn how your comment data is processed.

%d bloggers like this: