AMAK TA LANSA JINGLE PA E DI 50 EDISHON TUMBA 2020
12 di Yanüari 2020
AMAK TA LANSA JINGLE PA E DI 50 EDISHON TUMBA 2020
WILLEMSTAD – Den kuadro di selebrashon di e di 50 Edishon di Festival di Tumba, resientemente dos gran kantante, den e kaso aki Amos Balentin i Ike Jesurun, bou di guia di maestro Gregory Colina a graba un jingle espesial pa Festival di Tumba 2020.
Pa maestro Gregory Colina, e jingle aki a konsentrá riba tumba su lokashon, invitá pueblo bin gosa i duna atenshon na Doble R su tema 1,2,3 fásil i Dinosouro grandi ku a drenta Curaçao Festival Center, algu nunka bisto i ku nunka mas a keda igualá.
Pues tumba ta trese hopi kreatividat di parti di nos komo artista. Asina aki a duna Doble èkstra atenshon.
Direktiva di AMAK ta sumamente kontentu ku nos por a haña kolaborashon di tres miembro, den e kaso aki, Ike Jesurun, Amos Balentin i tambe Gregory Colina ku huntu a pone forsa musikal huntu, pa traha e bunita Jingle aki.
Athunto nos ta manda e letranan di e jingle aki ku pueblo kompletu por kanta, pero tambe e jingle den dos vershon. Unu kompletu i unu komo pista.
Tantu letra, melodia, areglo i produkshon di e jingle aki, tabata na enkargo di Gregory Colina, miéntras ku e programashon a tuma lugá na GC Studio.
Direktiva di AMAK ta konvensí ku pueblo di Kòrsou kompletu lo disfrutá di e jingle aki i for di awor aki ta deseá tur hende un felis i dushi Festival di Tumba 2020.
Atentamente
Direktiva di AMAK
