“Awor ku nos ta den e periodo di transishon pa Klesch tuma over, kiko ta e pasonan i plannan konkreto di gobièrnu pa loke ta trata e 180 hectare di tereno ku a bini liber, Jetty 2/Bullenbaai i e plan di komunikashon pa kontrarestá tur duda ku ta wòrdu ekspresá kontra di e dil ku Klesch”

Presidente di Parlamento

Sr. W. Millerson

Wilhelminaplein 4 

Presente 

 

Djamars, 14 di yanüari 2020

 

Tópiko: Awor ku nos ta den e periodo di transishon pa Klesch tuma over, kiko ta e pasonan i plannan konkreto di gobièrnu pa loke ta trata e 180 hectare di tereno ku a bini liber, Jetty 2/Bullenbaai i e plan di komunikashon pa kontrarestá tur duda ku ta wòrdu ekspresá kontra di e dil ku Klesch

 

 

Apresiable señor Millerson.

 

Pa medio di artíkulo 96 di Reglamentu di òrdu, mi lo kier pidi bo pa dirigí e siguiente karta ku e tópiko ariba menshoná na Eugene Rhuggenaath, minister di asuntunan general i alabes presidènt di Kòrsou.

 

Danki di antemano, 

 

Atentamente,

 

  1. Walroud

Parlamentario pa Kòrsou

 

Minister di Asuntunan General  

Minister President Sr. Eugene Rhuggenaath

 

Djamars, 14 di yanüari 2020

 

Tópiko: Awor ku nos ta den e periodo di transishon pa Klesch tuma over, kiko ta e pasonan i plannan konkreto di gobièrnu pa loke ta trata e 180 hectare di tereno ku a bini liber, Jetty 2/Bullenbaai i e plan di komunikashon pa kontrarestá tur duda ku ta wòrdu ekspresá kontra di e dil ku Klesch

 

Apresiable minister presidènt Rhuggenaath,

 

Pa loke ta trata futuro di nos refineria i tur esfuersonan ku gabinete Rhuggenaath (gobièrnu) ta hasí pa mantené e sektor petrolero riba nos isla na bida, hopi kos a pasa den e último dos añanan i mei. Gobièrnu a kita eksklusividat for di Guandong Zhenrong, a kambia MDPT su konfigurashon, a hera di haña Motiva na Kòrsou i a lanta PMO ku den apénas 9 luna a yega na Grupo Klesch. Mei mei di esaki kontinuamente gobièrnu a sinta na mesa ku sindikatonan aktivo riba tereno di Refineria Isla i a hèndel tambe ku gerensia di Refineria Isla/PDVSA te na final di nan kontrato. Dos aña i mei kargá ku masha hopi suseso for di kua a kana yega na unda nos ta awe. E susesonan di mas importante den e último dos lunanan tabata ku:

  • parlamento a bishita e refineria riba invitashon di gerensia di Refineria Isla ku un resultado ya konosí;
  • RDK a firma un ‘sales and purchase agreement’ ku Klesch;
  • RDK a disidí di no bai un periodo di transishon despues di 31 di desèmber 2019 ku Refineria Isla/PDVSA;
  • RDK a disidí ku RDK mes lo bai operá e refineria pa un periodo di transishon di maksimal 6 luna pa despues Klesch tuma over;
  • tur (eks) trahadó di Refineria Isla lo bai over den servisio di CRU pa e periodo di transishon.

Den e esfuerso pa mantené nos refineria habrí, ami komo miembro di parlamento di Kòrsou for di 2017 pero sigur den 2019 a sa di haña gobièrnu mas ku dispuesto pa dunami sufisiente informashon relevante i alkaso pa asina den mi ròl di kontroladó di gobièrnu mi por a hasi mi trabou. Di e forma aki tambe a lo largu di tempu mi por a duna gobièrnu e sosten nesesario pa gobièrnu sigui ku e esfuersonan pa na un manera realístiko hasi lo máksimo pa mantené nos refineria habri i asina maksimalisá e potensial di nos refineria pa nos ekonomia a base di riesgonan kargabel pa nos komunidat. Komo parlamentario mi ta spera den 2020 di por keda konta ku e mesun disponibilidat di gobièrnu pa informá ami komo miembro di parlamento di kada un stap ku den futuro lo wòrdu hasí pa loke ta trata e refineria/CRU i Bullenbaai. Di mi parti tambe den 2020, lo mi hasi tur esfuerso pa aserká oposishon pa asina laga e komishon temporal di parlamento yamá ‘komishon di kontinuashon i modernisashon di refineria funshoná manera mester ta i tambe motivá tur lider di frakshon di parlamento pa asistí na e ‘seniorenconventnan’ ku ta wòrdu yamá riba momentonan krusial den e proseso pa buska solushon pa ku nos refineria. 

Esaki pa evitá loke a sosode na 2017, 2018 i 2019 unda práktika a mustra ku solamente  miembronan di parlamento di koalishon i/o lidernan di frakshon di koalishon ta asistí na e reunionnan importante aki.

 

Awor ku nos ta na kuminsamentu di 2020 i pues na inisio di e periodo di transishon, por tuma nota ku ya e gran mayoria di e eks trahadónan di Refineria Isla a bai registrá nan mes na CRU i tambe ku Sr. Gary Klesch i su tim a bishitá Kòrsou. Por a tuma nota tambe ku Sr. Gary Klesch a sinta na mesa ku diferente gruponan di interes manera gobièrnu i tambe ku e diferente sindikatonan vinkulá ku e refineria. Notabel tabata ku e kabesantenan sindikal a mustra di ta positivo na final ku nan reunion ku Sr. Klesch. Esaki ta duna e indikashon fuerte ku tur kos ta kanando manera gobièrnu huntu ku RDK a planeá.

 

Loke tambe por tuma nota di dje ta e kantidat kresiente di informashon tendensioso i manipulativo ku lamentablemente ta wòrdu lansá ku insistensia kontra di henter e proseso ku gobièrnu ta kanando pa mantené nos refineria habrí. Si na 2017, 2018 i 2019 e akusashon di mas grandi tabata ku gobièrnu su agènda skondí tabata ku gobièrnu ke sera e refineria, awor direpente for di desèmber 2019 e akusashon a kambia di gobièrnu ku ke sera e refineria pa un akusashon ku gobièrnu ta robando pueblo di Kòrsou dor di regalá nos patrimonio nashonal ku ta e refineria i Bullenbaai pa $1 na Gary Klesch su kompania. Den e mesun rosea ta wòrdu bisá ku mirando e robo aki i ku Klesch ta bai gana masha hopi sèn na un manera fásil ku ‘nos’ refineria i Bullenbaai, mester revoká e dil ku Klesch pa despues nos mes komo pueblo di Kòrsou operá e refineria i gana tur e sènnan ei nos mes. Un tendensia di argumentá hopi preokupante unda mentenan maligno ta krea un realidat fiktisio i no realístiko mirando e estado di nos refineria i CRU pa loke ta trata balor i mantenshon, e invershonnan rekerí, e mundu  petrolero, e merkado petrolero i e posishon finansiero di pais Kòrsou.

 

Mirando tur esakinan lo mi ke sa kiko ta e planifikashon di gobièrnu i/o RDK pa loke ta trata e pasonan ku tin ku wòrdu tumá pa ku e operador nobo Klesch den e periodo di transishon aki. Tambe lo mi ke sa mas tokante e manera ku ta bai desaroyá e 180 hectare di tereno rondó di Schottegat ku a bin liber na 2020. Banda di esaki lo mi ke sa kiko ta e plannan pa ku desaroyo di e terenonan bashí na Bullenbaai ku akseso na kosta via di ‘Jetty 2’. Finalmente lo mi ke sa kiko ta e plan di komunikashon di gobièrnu pa kontrarestá tur e esfuersonan ku ta wòrdu hasí pa pone henter e dil ku Klesch den un mal lus ku e meta pa revoká e dil. Den e kuadro aki mi tin e siguiente preguntanan na gobièrnu hasiendo uso di mi derecho di hasi pregunta na gobièrnu konforme artíkulo 96 di reglamentu di òrdu di Parlamento di Kòrsou:

  1. Kiko presis tin ku tuma lugá den e periodo di transishon pa loke ta trata Klesch? Kiko mester wòrdu negoshá ainda i ku kua entidatnan Klesch tin ku sinta na mesa?
  2. Ki ora tur kos ta kla pa hasi e traspaso di e refineria/Cru/Bullembaai na Klesch? Kua akuerdonan/kontratonan mester wòrdu firmá? Ken, ku ken òf kua entidat ku kua entidat lo firma e akuerdonan?
  3. Gobièrnu a base di un mapa por duna ubikashon di e 180 hectare di tereno ku a bini liber?
  4. E terenonan aki tur ta kai bou di propiedat di RDK?
  5. E terenonan aki ta parselá kaba ku nan propio meetbrief?
  1. Kua di e terenonan ta kontaminá? I di kua tipo di kontaminashon nos ta papiando di dje?
  2. Kiko ta e plan pa kada pida tereno òf area? Kiko ta bai wòrdu desaroyá? Ki tipo di negoshi lo bai bin? Tin un masterplan kaba pa e area/terenonan manera komparabel ku e masterplannan di e area di Rif, Marie Pampoen i Caracasbaai?
  3. Lo bini un komishon/entidat manera PMO pa desaroyá e terenonan aki i buska partnernan stratégiko?
  4. Otro kompanianan di gobièrnu tambe ta bai wòrdu enbolbí den desaroyo di e terenonan aki manera Curoil, CPA, Curinde, Aqualectra, Selikor etc?
  5. Entidatnan òf kompanianan Hulandes tambe lo bai hunga un ròl manera por ehèmpel Gemeente Rotterdam/Amsterdam i Port of Rotterdam?
  6. E terenonan aki lo bai wòrdu traspasá den forma di ‘erfpacht’ meskos ku awor aki ta e kaso ku Klesch? Si e kontesta ta si, kiko ta wòrdu premirá komo un ‘erfpachtscanon’ realístiko?
  7. Kiko ta e estado di mantenshon di Jetty 2 na Bullenbaai? RDK ta hasiendo trabounan pa pone Jetty 2 bek na un estado operashonal? Kuantu esaki ta bai kosta na invershon? Ta RDK ta karga e riesgonan aki?
  8. Kuantu tanki di almasenahe tin mará na Jetty 2? Kon e estado di mantenshon di e tankinan aki ta? Kuantu ta bai kosta na invershon pa pone e tankinan aki bek den operashon? Ta RDK ta karga e riesgonan aki?
  9. Kiko ta e plannan a korto plaso, plaso mediano i largu plaso di e terenonan bashí rondó di Bullenbaai? E plannan aki ta inkluí un planta di LNG?
  10. Ta bèrdat ku gobièrnu pa loke ta trata e dil ku Klesch ta skondiendo tras di “non disclosure” i ta keda sin suministrá parlamento i konsekuentemente pueblo di Kòrsou informashon importante?
  11. Ta bèrdat ku gobièrnu ta hortando/robando pueblo di Kòrsou dor di bende te hasta regalá nos patrimonio nashonal ku ta e refineria i Bullenbaai pa $1 na Gary Klesch su kompania?
  12. Ta bèrdat ku RDK tin ku risibí un erfpacht canon di por lo ménos 45 mion florin pa aña i no solamente 15 mion florin?
  13. Por revoká e dil ku Klesch na e momentunan aki? I kuantu esei lo bai kosta pueblo di Kòrsou?
  14. Kon realístiko ta ku pueblo di Kòrsou mes operá e refineria i Bullenbaai?
  15. Ta bèrdat ku RDK/gobièrnu pa semper a bende nos hafnan di Schottegat i e ‘diepzee haven’ Bullenbaai “den eigendom” na Klesch unda pueblo di Kòrsou pa semper no tin akseso mas na e hafnan aki?
  16. Ta bèrdat ku RDK/gobièrnu ta violando e tratado di BUPO ora e terenonan na Schottegat i Bullenbaai wòrdu traspasá den erfpacht na Klesch?
  17. Kiko ta e plan di komunikashon ku gobièrnu ta bai mantené den aña 2020 pa duna informashon verídiko na pueblo di Kòrsou i pa kontrarestá e tendensia di manipulashon di informashon?

Mirando ku nos ta den e periodo di transishon ku ta dura maksimal 6 luna pero tambe mirando ku nos ta mei mei di kambionan grandi den nos ekonomia unda propiedatnan di gobièrnu (asset) mester wòrdu desaroyá mas lihé ku ta posibel den propiedatnan ku ta generá entrada, stimulá invershon i impulsá nos ekonomia, lo mi apresiá pa den kuadro di mi trabou komo parlamentario haña kontesta mas lihé ku ta posibel.

 

Atentamente,

Stephen Walroud
Parlamentario di Kòrsou

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: