Promé Minister Rhuggenaath ta risibí Minister Knops
Promé Minister Rhuggenaath ta risibí Minister Knops
Geplaatst op 17 January 2020 dor di Ministerio Asuntunan General i Promé Minister
WILLEMSTAD — Djaweps 16 di yanüari, Promé Minister Rhuggenaath a risibí Minister Knops ku e siman aki ta di bishita na islanan Aruba, Boneiru i Kòrsou. Durante e kombersashon entre Promé Minister Rhuggenaath ku Minister di Asuntunan di Reino Sr. Knops a trata diferente tópiko di interes, entre otro e inseguridat ku ta keda eksistí pa ku e impakto di Venezuela i e sosten finansiero ku Hulanda a duna i desaroyonan resien pa ku institutonan finansiero na Kòrsou. Prinsipalmente e mandatarionan a kombersá riba e afspraknan ku a hasi den e Akuerdo di Kresementu i kon ta kanando ku implementashon di esaki i e Strategia di Kresementu.
Sentral den e Strategia di Kresementu ta stimulá ehekushon i implementá reformanan nesesario riba terenonan di maneho finansiero, aparato gubernamental, kresementu ekonómiko i desaroyo sosial. Pa ku e pilar finansiero, Gobièrnu di Kòrsou ya a tuma diferente paso pa baha gastu i subi entrada. Den kuadro di optimalisá funshonamentu di aparato gubernamental, ta kanando prosesonan di digitalisashon, optimalisashon di ‘payroll’, un oferta pa empleadonan públiko ku kier baha trempan por hasi esei i tambe a hasi preparashonnan pa pronto kuminsa ku un “Government Academy” i asina invertí den empleadonan públiko. Relashoná ku e parti ekonómiko ta trata akshonnan pa desaroyá sektornan spesífiko, manera plannan pa desaroyo den haf i desaroyo di áreanan manera den sentro di siudat. Banda di esei, ya e trayekto pa prepará hende pa trabou den turismo ta kana i na 2020 lo inisiá e promé proyektonan di e Agènda Sosial pa duna mas guia na famianan i invertí den e struktura sosial.
Pa aselerá e implementashon di e Strategia di Kresementu i kumpli ku e afspraknan den e akuerdo ku Hulanda, a bini ku un kuadro di ehekushon pa tur partido ta na altura. Den e akuerdo tin stipulá ku Kòrsou por pidi asistensia tékniko i tambe ku Gobièrnu di Kòrsou por fia fondonan adishonal si tin adelanto den implementashon, pa invertí den tur e proyektonan. Despues di a risibí e reportahe pa ku implementashon, Minister Knops a konfirmá ku Gobièrnu por hasi uso di e promé posibilidat pa fia 30 mion. Gobièrnu di Kòrsou ta kontentu ku esaki, pasó huntu ku e reformanan mester hasi invershonnan nesesario pa katalisá un desaroyo sosial-ekonómiko duradero.
Durante parti di e kombersashon ku Minister Knops, Minister Kenneth Gijsbertha i Minister Camelia-Römer tambe a djòin pa por duna un bista di e trayektonan ku ta kai bou di nan i tambe esfuersonan di Gobièrnu pa ku stabilisashon di institutonan finansiero i tambe mehorashon di finansas públiko.
Gobièrnu na e momentunan aki ta dunando kontenido na diferente proyekto i tim p’asina traha dediká na realishon di e metanan stipulá pa logra bòltu e situashon finansiero i logra kresementu sosial-ekonómiko.