Frakshon di MAN ta felisitá Bario di Banda Bou ku apertura di sala multifunshonal na Barber dediká na Shon Pe Hooi.

Frakshon di MAN ta felisitá Bario di Banda Bou ku apertura di sala multifunshonal na Barber dediká na Shon Pe Hooi.

 

Resientemente tabatin apertura di e Sala Multifunshonal na Barber ku ta karga nòmber di Pedro Hooi, mihó konosí komo Shon Pe Hooi. 

Shon Pe Hooi ta un di e baluartenan di Banda Bou ku a dediká gran parti di su bida  entrenando muchanan den diferente tipo di deporte.

Frakshon di MAN ta sumamente kontentu ku Gobièrnu di Kòrsou a rekonosé e trabounan di Shon Pe Hooi riba tereno deportivo i nombra e Sala Multifunshonal na Barber na su nòmber. Frakshon di MAN ta felisitá Shon Pe Hooi pa ku esaki.

Frakshon di MAN ta felisitá pueblo di Banda Bou pe hechu ku porfin nan por dispone di un sala multifunshonal pa hasi deporte. Konstrukshon di e sala multifunshonal aki ta un inisiativa ku a kuminsá hopi tempu pasa bou di guia di entre otro di Sr. Anthony Godett ku komo diputado a pone e tereno disponibel, pero tambe Sra. Zita Jesus-Leito ku a sòru pa e parti di e finansiamentu den kuadro di e proyekto SEI (Sociaal Economisch Initiatief). 

Un rekonosimentu tambe na nos gobièrnu aktual di Kòrsou ku a sòru pa e sala keda kla i ta disponibel pa skolnan por hasi deporte parti mainta i e pueblo por hasi uso di e fasilidat parti atardi.    

Ku apertura di e sala multifunshonal aki pueblo di Banda Bou i alumnonan di e diferente skolnan den e area di Banda Bou ta haña mas oportunidat pa nan desaroyo físiko.