Introdukshon di ABB plùs, ku e intenshon pa kubri e pèrdida di alrededor di 776 mion di Giro Bank

Willemstad, 10 di febrüari 2020

 

Presidente di Parlamento di Kòrsou

Señor W. Millerson

Wilhelminaplein # 4

PRESENTE

 

Señor Millerson,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di finansa, señor Kenneth Gijsbertha.

 

Danki pa e koperashon.

 

Atentamente,

 

Charles Cooper

Parlamentario

pa frakshon di MFK

 

Minister di Finansa

Señor K. Gijsbertha
PRESENTE

Kòrsou, 10 di febrüari 2020


Tópiko: Introdukshon di ABB plùs, ku e intenshon pa kubri e pèrdida di alrededor di 776 mion di Giro Bank i introdukshon di un fondo di garantia pa bankonan

 

Señora Minister Gijsbertha,

 

Pa medio di esaki suskrito Charles Cooper, miembro di Parlamento di Kòrsou pa frakshon di MFK ta aserka bo persona komo minister di finansa públiko, pa por haña klaridat riba e introdukshon di ABB plùs i e fondo di garantia pa bankonan. 

 

Frakshon di MFK a tuma nota den prensa ku ta e intenshon di gabinete Rhuggenaath pa oumentá e tarifanan ku originalmente a wòrdu anunsiá ku introdukshon di ABB, ku un porsentahe pa asina por kubri e pèrdida registrá den e debakel di Giro Bank. Tambe Minister di finansa a anunsiá ku lo bai introdusí un fondo di garantia ku bankonan lokal mester bai depositá un sierto suma den e fondo aki.

 

Na masha hopi okashon nos por a skucha Minister Gijsbertha deklará den prensa, ku gabinete Rhuggenaath lo no bin ku medidanan fiskal, debí ku pueblo di Kòrsou no tin mas espasio finansiero pa karga kualkier medida fiskal. Ku introdukshon di ABB plùs, Minister ta hasi nèt kontrali di loke Minister mes a prediká, esta ku pueblo di Kòrsou no tin forsa finansiero pa karga medida fiskal i awor Minister ta oumenta e tarifa di ABB.

   

Durante reunion den Parlamento riba e debakel di Giro Bank, Minister Gijsbertha a bisa eksplísitamente ku su persona no por wòrdu pone responsabel pa e maneho desastroso ku a hiba na Giro Bank i ku a kondusí na pèrdida di 776 mion florin, siendo ku Minister ta esun responsabel pa ehekushon di lei di “Bankwezen”.

 

Ta inkreibel ku Minister Gijsbertha kier introdusí un ABB plùs, kaminda Minister ta bai pone pueblo di Kòrsou, ku no ta responsabel pa loke a pasa den Giro Bank pa medio di un medida fiskal paga pa e pèrdida di 776 mion di Giro Bank. Pero Minister Gijsbertha si no ta responsabel.

 

Te awe Minister no a tuma ningun akshon konkreto pa pone esnan ku a kousa e pèrdida den Giro Bank responsabel pa nan aktonan. Minister ta skonde tras di un supuesto investigashon pa protehé kompinchinan polítiko i direktornan di CBCS pa no pone nan responsabel pa e loke a pasa den Giro Bank. 

 

Pa e motibunan ariba menshoná, frakshon di MFK ta aserka Minister di finansa, konforme artíkulo 96 di reglamentu di Orden, ku e siguiente preguntanan relashoná ku introdukshon di ABB plùs i e fondo di garantia pa bankonan;

 

  1. Minister por informá Parlamento ku ta bèrdat ku a oumentá e tarifa inisial di ABB pa kubri e pèrdida di 776 mion den Giro Bank?

 

  1. Minister ta esun ku konforme nos demokrasia ta responsabel pa ehekushon di leinan finansiero na Kòrsou, kon por ta posibel ku Minister ta deklará den Parlamento ku Minister no por wòrdu pone responsabel pa e pèrdida na Giro Bank?

 

  1. Minister kier introdusí un ABB plùs kaminda al final ta pueblo di Kòrsou ta bai paga e pèrdida den Giro Bank, kua ta e motibunan ku a kondusí Minister pa pone pueblo paga pa e pèrdida di 776 den Giro Bank?

 

  1. Minister ta haña ku ta responsabel i hustu ku pueblo di Kòrsou mester paga for di nan saku pa e pèrdida den Giro Bank?

 

  1. E “Bank-run” ku tabatin na Giro Bank, ken ta investigando esaki i dikon esaki ta durando asina largu, Minister por duna un fecha ki dia ta konkluí e investigashon aki?

 

  1. E mal maneho ku tabatin na Giro Bank, ken ta investigando esaki i Minister por duna un fecha ki dia ta konkluí e investigashon aki?

 

  1. Minister ta bai introdusí ABB plùs, sin ku a pone ningun persona òf Minister mes responsabel pa e pèrdida di 776 mion na Giro Bank?

 

  1. Minister a skucha durante di e reunion públiko riba e tópiko di Giro Bank, ku un miembro ku ta sostené gobiernu a pidi pa laga pone bui i riba man di esnan responsabel i sera nan den SDKK pa loke a pasa ku Giro?

 

  1. Minister por informá Parlamento, e detayenan relashoná ku introdukshon di un fondo di garantia pa bankonan lokal i ken lo bai manehá esaki?

 

  1. Kon Minister ta bai garantisá ku bankonan lokal lo no bai oumentá nan tarifanan di servisio, ku lo tin komo konsekuensia ku ta pueblo di Kòrsou ta bai karga ku e suma ku bankonan mester depositá den e fondo aki?

 

  1. Kon Minister Gijsbertha ta garantisá ku pueblo di Kòrsou no ta bai paga ABB plùs i tambe oumento di tarifanan di bankonan i asina forsa di kompra di pueblo bai mas atras?

 

  1. “Raad van Advies” (RvA) a tòrnu hinter e proyekto di lei aki di ABB for di otro i RvA a indiká ku introdukshon di ABB lo tin konsekuensianan negativo pa ekonomia di Kòrsou, kon Minister ta bai atendé ku e konseho di RvA?

 

  1. Minister a manda e lei di ABB bek pa RvA pa konseho, awor ku e ABB a bira ABB plùs? 

 

Manera ya indiká pa frakshon di MFK introdukshon di ABB plùs ta un medida inhustu, kaminda ta pone pueblo di Kòrsou den su totalidat responsabel pa paga algu ku nan no tin arte ni parte den dje. Mientras ku esnan responsabel mes Minister no ta tuma ningun akshon kontra di nan, pa manda un mensahe bon kla ku loke a pasa na Giro Bank ta algu inakseptabel.

 

Nos ta spera kontesta di Minister Gijsbertha den un término korto, pa pueblo di Kòrsou por sa kiko ta spera nan ku e medida apsurdo aki di ABB plùs i introdukshon di un fondo di garantia pa bankonan. 

 

Atentamente,

      

 

Charles Cooper

Parlamentario

pa frakshon di MFK

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: