Elsa Rozendal di MAN: Mester laga hasi un investigashon sientífiko riba desaroyo laboral

Elsa Rozendal di MAN: Mester laga hasi un investigashon sientífiko riba desaroyo laboral

 

Pa mas ku sinku aña Parlamentario Rozendal ta manehá e página di Facebook, Kòrsou TIN Trabou, kual ta kompartí tur dia vakatura i informashon balioso pa e buskadó di trabou. 

Durante e mas ku sinku añanan tras di lomba Rozendal a bin ta opservá varios desaroyo rondó di e tema di trabou. Sigur pa loke ta trata pensamentu i aserkamentu di e buskadó di trabou. Tambe e parlamentario ta haña regularmente ‘feedback’ di dunadónan di trabou. 

 

Rozendal ta bisa ku e por hasi su propio analisis pero ta di opinion ku ta sumamente importante pa Ministerio di SOAW laga hasi un investigashon sientífiko riba desaroyo laboral. Esta, kompartashon laboral, kiko e buskadó i dunadó di trabou ta vèrwagt, dikon tin hende ta bini na remarke pa trabou i otronan no, djies pa menshoná algun aspekto. Asina so segun Rozendal por yuda i guia e buskadó di trabou mihó. 

 

E parlamentario a manda algun  pregunta pa minister Hensley Koeiman. Asina e ke sa si e Minister a laga hasi un investigashon sientífiko kaba riba kompartashon laboral, esta, kiko e buskadó i dunadó di trabou ta vèrwagt, dikon tin hende ta bini na remarke pa trabou i otronan no. Tambe e ke sa si e Minister tin un maneho pa yuda i guia e buskadó di trabou i kua ta e proyektonan ku ministerio di SOAW tin pa yuda i guia e buskadó di trabou. Al final e a puntra kon lei ta ku ehekushon di e “Manpowerplanning”.