Dianan Habrí na Barber tabata un éksito; Proyekto ‘Kla pa Turismo’ ta sigui habri oportunidatnan pa trabou den sektor di Hospitalidat

Dianan Habrí na Barber tabata un éksito; Proyekto ‘Kla pa Turismo’ ta sigui habri oportunidatnan pa trabou den sektor di Hospitalidat

Geplaatst op 20 February 2020 dor di Ministerio Desaroyo Ekonómiko

WILLEMSTAD – Sektor turístiko ta sigui krese i den e kresementu aki tin espasio pa tur ku tin e afan pa duna su kontribushon na adelanto di nos pais. Den kuadro di e trayekto di ‘Kla pa Turismo’, Ministerio di Desaroyo Sosial Labor i Bienestar (SOAW) konhuntamente ku Ministerio di Desaroyo Ekonómiko (MEO) i den estrecho kolaborashon ku CHATA, a organisá resientemente un ‘Dia Habri’ na Sentro Multifunshonal na Barber. Durante e dia habrí aki a yega mas serka di e habitante di Bándabou ku kisas tambe tin e deseo di laborá den sektor di hospitalidat.  

Durante  di e dia habrí aki un i tur por a akudí i registrá nan mes pa por bini na remarke pa risibí entrenamentu i un trabou den sektor turístiko. Apesar ku e dia habri tabata enfoká mas riba e nesesidatnan den sektor turístiko, a tuma tambe dato di personanan ku a akudí enbuska di un empleo den otro ramonan di trabou.
Na e okashon aki tantu Minister Hensley Koeiman  komo Minister Giselle McWilliam a dirigí algun palabra di motivashon i empoderashon na e personanan ku a akudí i a splika e intenshon di e dia habrí.

Pa loke ta trata e empleonan disponibel den sektor di hospitalidat, esnan ku a akudí por a registrá pa un entrenamentu i trabou sea komo asistente di servisio (Bediening assistent), asistente di kushina (Keuken assistent), seguridat (Security) òf trabou doméstiko (Housekeeping). Esakinan ta tambe e áreanan kual sektor di hospitalidat lokal a indiká ku tin nesesidat di hende riba término korto.

Un grupo representativo a registrá durante di e dia habrí na Barber ku interes pa sigui un trayekto di preparashon pa un di e kuater funshonnan ariba menshoná.

Djárason 19 di Febrüari último tabatin un di dos enkuentro durante kua a hiba un kòmbersashon mas profundo ku e personanan ku a mustra interes pa asina wak nan afinidat ku e diferente disiplinanan di trabou ariba  menshoná.  Di e personanan ku a keda registrá a skohe 27 persona ku siguientemente lo sigui kurso i preparashon den e trayekto di ‘Kla Pa Turismo’ pa asina kuminsá laborá den e sektor.

E inisiativa aki ta e promé paso den kuadro di e vishon di e dos ministernan i e trayekto ‘Kla pa Turismo’ pa trese kuponan di trabou mas serka di esnan enbuska di un empleo. E intenshon ta ku lo kontinuá ku e trayekto aki tambe den diferente bario di Kòrsou pa di e forma aki Gobièrnu logra minimalisá mas ku ta posibel tur barera ku ta pone ku un persona lo por pèrdè oportunidatnan di trabou.

Pronto e ‘Kla pa Turismo’ lo yega tambe mas serka di abitantenan di barionan parti pariba di Kòrsou  i tambe lo organisá un di dos enkuentro na Bándabou pa personanan ku ainda tin e interes pa laborá den sektor turístiko.
Tantu minister Koeiman komo minister Mc William ta mira bek ku orguyo riba e impakto positivo ku e proyekto aki tabatin den e último enkuentronan na Barber. Ta un satisfakshon pa mira bek ku e kolaborashon entre SOAW i MEO konhuntamente ku CHATA ta sigui kontribuí na oportunidat pa nos hendenan i duna fruta na desaroyo di nos ekonomia.