RDK TA SPLIKA ESFUERSO PA GARANTISA PRODUKTO PETROLERO NA MERKADO LOKAL KOMPARA KU TEMPU REFINERIA TABATA DEN FUNSHON

RDK TA SPLIKA ESFUERSO PA GARANTISA PRODUKTO PETROLERO NA MERKADO LOKAL KOMPARA KU TEMPU REFINERIA TABATA DEN FUNSHON

Willemstad 3 di mart 2020- Kòrsou mester por keda konta ku kombustibel i gas pa nos bida por siguí normal tur dia. E situashon aktual, kaminda ku tin e refineria pará en espera di e próksimo operadó, a pone Gobièrnu di Kòrsou, Curoil i RdK aktivá, manera anunsiá, un plan di kontigensia. Di e forma aki Kòrsou ta keda garantisá di e.o. gasolin, diesel i gas, durante di un periodo di transishon di e refineria.  Pa garantisá esaki Curaçao Refinery Utilities (CRU) mester usa kombustibel importá i mantené fasilidatnan den e refineria den funshon. Esaki ta trese su gastunan kuné. Refineria di Kòrsou (RdK) ta kere ta bon splika i aklará e situashon aktual, kompará ku momentu ku ora tin un operadó i e refineria ta den fushon.

 

Tempu ku Refineria Isla tabata manehá i operá e refineria, CRU i Refineria Isla tabatin un akuerdo kaminda CRU tabata risibí kombustibel ku e refineria mes tabata produsí i usa den su mes fòrnunan, i a kambio Refineria Isla tabata risibí koriente, stom, airu i awa desaliná pa su produkshon. Refineria Isla tabata paga CRU tambe un asina yama ‘take or pay fee’.   For 2018 sinembargo Refineria Isla no tabata operando e refineria di forma optimal. Konsekuentemente, for di e tempu ei mayoria produkto petrolero pa konsumo lokal, tabata keda importá dor di Curoil, ku eksepshon di kombustibel pa CRU ku ainda a keda disponibel. Komo parti di e akuerdo ku RdK, Refineria Isla no tabata kobra pa e kombustibel ni tampoko pa uso di e fasilidatnan nesesario pa suministro di produkto lokal.  Tabatin sufisiente kombustibel den tankinan pa por suministrá CRU. Aworakí, den e aktual periodo di transishon, nos refineria no ta produsiendo ningun produkto inkluso no ta suministrá e kombustibel mas sin pago. A resultá ku mester importá e kombustibel i paga p’e.  

Awor ku Kòrsou ta importando su produktonan, mester deskargá barku, almasená e produkto i distribuí e produkto. Esaki ta trese gastunan operashonal manera mantenshon di e infrastruktura, seguro di e produktonan den tanki, tèst di laboratorio, produkshon di utilidatnan, seguridat, brantwer i mas.  Partikularmente e manera ku CRU ta prosesando e deskargamentu, almasenahe i despacho di gas LPG, ta un proseso kostoso komo ku infrastruktura di e refineria ta rekerí importashon i deskarga di e gas friu (kriogeno). Despacho i distribushon ta rekerí stom, stom ta rekerí bòiler i bòiler ta rekerí kombustibel.    

Bal enfatisá ku e gastunan aki NO ta inkluí e kosto di alrededor di 900 trahadó ku ta laborá riba nos refineria den e periodo di transishon.  Disponibilidat di nos mes ekspertonan, ku amplio konosementu di e refineria, ta di vital importansha pa garantisá un futuro pa nos refineria. Ta hasi e invershon aki for di reservanan di RdK, komo parti di esfuersonan pa garantisá un futuro duradero di nos refineria.

Pa finalisá RdK ke hasi uso di e oportunidat pa koregí un informe inkorekto ku ta sirkulá den media komo sifuera èrfpacht na Grupo Klesch ta konforme un “gliding scale.”  Esaki no ta kuadra ku realidat.  

Den e kaso spesífiko aki e terenonan (ku ta keda propiedat di Kòrsou) ta keda otorgá den ‘long lease’ (kaminda anualmente ta subi esaki ku un tasa di inflashon te na un máksimo defini) pues ta manera un èrfpacht di un kas.  Esaki ta generá un entrada anual pa Kòrsou. Ademas, lo risibí un asina yamá ‘throughput fee’ segun e kantidat di produktonan ku ta pasa dor di nos Bullenbaai. Di e forma aki Kòrsou awor ta probechá tambe di e potensial ku Bullenbaai tin pa e operadó.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: