Minister Mc William ku atenshon pa seguridat na Parke Flamingo
Minister Mc William ku atenshon pa seguridat na Parke Flamingo
Geplaatst op 08 March 2020 dor di Ministerio Desaroyo Ekonómiko
WILLEMSTAD- Konsiderando e kantidat alarmante di atrakonan ku últimamente a tuma lugá riba turistanan, Minister di Desaroyo Ekonómiko, sra Giselle Mc William a hasi un bishita na Parke di Flamingo na Wilibròdus huntu ku Minister di Tráfiko, Transporte i Desaroyo Urbano, sra. Zita Jesus-Leito i sr. Ritzel Godfried di Ofisina di Turismo. E bishita aki a sirbi pa ámbos minister por a tuma nota di e situashon na e parke i pa huntu ku nan respektivo ministerionan i otro partnernan traha pa alsa seguridat den e área aki tantu pa turistanan komo tambe pa bishitantenan lokal di e parke.
No muchu tempu pasá nos pueblo por a tuma nota ku desafortunadamente un biaha mas un turista a keda atraká den área di Parke Flamingo situá na Jan Kok, Wilibròdus. Ta un echo ku ya pa hopi tempu kaba ekonomia di pais Kòrsou ta keda sostené pa gran parti dor di e aporte ku turismo ta kontribuí. Kada suseso lamentabel ku sosodé ku un turista ku skohe Kòrsou komo destinashon ta un mal propaganda pa nos isla kual alafin lo hasi daño direkto o indirekto na nos tur. Parke Flamingo ta un sitio turístiko ku ta ofresé un eksperensia eksepshonal na kada un bishitante; un eksperensia ku memoria nan ku lo dura pa semper. Ta berdaderamente di lamentá ku antisosialnan kada bes ta tacha e eksperensia aki dor di nan aktonan deskabeyá.
Durante nan bishita na Parke Flamingo, minister Mc. William huntu ku minister Jesus-Leito i sr Godfried por a tuma nota di e diferente retonan ku tin pa ku seguridat den i rondó di e parke. Echo ta, ku mester uni forsa i tuma e pasonan nesesario pa asina logra alsa e seguridat den Parke Flamingo; no solamente pa turistanan pero tambe pa nos mes hendenan ku bishita e parke. Minister Mc William huntu ku minister Jesus-Leito a tuma nota entre otro di ahustenan ku tin ku tuma lugá pa ku por ehèmpel e área di parker, velosidat di vehíkulonan den e área i e seguridat general den e parke. Mientrastantu ya Ofisina di Turismo a kuminsá tuma pasonan nesesario i lo kontinuá esaki ku e meta pa e bunita área aki ta seif pa tur ku bishit’é.
