Manda bo lista, i pick-up bo kompra sin mester baha for di outo: Carrefour Market ta introdusí ‘WhatsApp Shopping’

Manda bo lista, i pick-up bo kompra sin mester baha for di outo:

Carrefour Market ta introdusí ‘WhatsApp Shopping’

 

WILLEMSTAD:-  Carrefour Market na Sambil a introdusí su ‘WhatsApp Shopping’ di manera ku klientenan por manda un mensahe di WhatsApp ku nan lista di kompra i buska esaki sin ku nan mester baha for di outo. Maneho di e supermerkado ta splika ku Carrefour a aktivá su protokòl di prevenshon pa nan propio empleado- i klientenan. “Nos tambe ta siguiendo e desaroyonan di COVID-19 di serka, i ku introdukshon di e ‘WhatsApp Shopping’ nos ke fasilitá nos klientenan dor di hasi e kompra pa nan i entregá esaki ‘curbside’, pues te pafó na outo. Klientenan por sigui bishitá nos supermerkado normal, e servisio aki ta simplemente pa fasilitá”. 

 

WhatsApp Shopping:

Ta asina ku ku e kliente ta manda su lista di kompra via WhatsApp #523-4494, si e ta deseá por hasta manda un foto di e produkto, seguidamente e kliente ta duna un orario di entrega, e ta parker pafó na Carrefour i un representante di Carrefour lo hasi entrega di e kompra. No tin un límite di produkto, ni un montante mínimo i tampoko no tin niun gastu di servisio. Tene kuenta ku ta aseptá únikamente tarheta di débito òf krédito komo forma di pago. 

 

Lùnch tur mèrdia pa take-out:

Den e ahustenan ku Carrefour a hasi relashoná ku COVID-19 ta inkluí ku mester a sera e popular Bon Appétit Cafe te ku un próksimo aviso. Esaki ta nifiká ku lùnch ta keda sirbí tur dia pa take-out únikamente. Maske Sambil a sera pa motibunan di prevenshon, Carrefour Market si a keda habrí pa duna servisio na komunidat den e proseso difísil aki. Klaro, manteniendo su mes na instrukshonnan di prevenshon establesé pa gobièrnu i outoridatnan lokal. E supermerkado na Sambil, tin su propio entrada i ta habrí di djaluna pa djasabra for di 7:30 pa 20:30 i djadumingu for di 09:00 pa 19:00.  

 

Carrefour Market ta prepará:

Maske limpiesa i higiena ta un tòp prioridat pa Carrefour, tòg a pone desinfektante disponibel grátis pa tur kliente por limpia e man di e makutu i garoshinan na nan kumbinensia komo èkstra prekoushon. Ta pidi tur kliente mantené 2 meter di distansia ora para den fila di pago, òf na momentu di hasi kompra. Carrefour ta espasioso pues e ‘social distancing’ no ta afektá e eksperensia di e kumpradó. Ta pidi tur kliente ku ta sinti nan kurpa malu pa no bin supermerkado, tambe pa preferiblemente no bishitá supermerkado ku mucha. Tambe, ta pidi siudadanonan pa duna un man na grandinan ku no por akudí na supermerkado, aki por fásilmente hasi uso di e  ‘WhatsApp Shopping’ ku Carrefour a introdusí. Ta stimulá pago ku tarheta di débito òf krédito pa minimalisá kontakto, i finalmente Carrefour ta apelá na su klientenan i komunidat di Kòrsou pa sigui instrukshonnan di gobièrnu den e proseso di COVID-19. Pa mas informashon di e diferente ofertanan di Carrefour por bishitá e página di Facebook /carrefourmarketcuracao òf e wèpsait www.crfrcuracao.com 

 

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: