Frakshon di MFK a keda den shòk,despues di a tende kuater (4) ministera presentá e pakete di alivio

Frakshon di MFK a keda den shòk,despues di a tende kuater (4) ministera presentá e pakete di alivio

 

Karta habri di parti di Charles Cooper na pueblo di Kòrsou

 

Apresiabel Pueblo di Kòrsou,

 

Frakshon di MFK a keda den shòk, despues di a tende kuater (4) minister presentá e pakete di alivio. E siudadano nan ku a konsekuensia di e Pandemia aki a wòrdu afektá sosial i finansieramente, a wòrdu kompletamente lubidá den e pakete di alivio aki di gabinete Rhuggenaath

 

Frakshon di MFK konsientemente a skohe na momento ku a detektá e promé kaso di e vírus Covid-19 na Kòrsou pa duna gobièrnu di Kòrsou e espasio nesesario pa nan por traha pa pueblo di Kòrsou sali bon for di e situashon ku e vírus aki a i ta okashoná.

 

Esei ta motibu ku dia 15 di mart 2020, lider di frakshon di MFK a manda pa medio di un mail a manda un karta pa presidente di Parlamento, ku e petishon pa kanselá tur reunion di Parlamento asina Ministernan ku mester ta presente durante di e reunionnan aki por dediká nan mes na e problemanan ku Covid-19 ta trese kuné. Nos ta apresiá ku Presidente di Parlamento a tuma nos konseho na konsiderashon i a ehekutá esaki.

 

Djaluna 21 di mart lider di frakshon di MFK a saka un karta habri, pa pueblo di Kòrsou kaminda nos ta pidi pueblo di Kòrsou pa sigui e instrukshonnan di gobièrnu i ekspertonan pa asina evitá ku lo tin mas hende ku lo keda kontaminá ku e vírus.

 

Den e mes un karta aki nos a indiká algun di e puntonan ku mester keda inkluí den e pakete di alivio. Manera entre otro;

 

  • Habri awa deskonektá di tur siudadano i no solamente di esnan ku ta registrá na SOAW
  • Adaptá i/òf posponé pago di awa i koriente. Tene kuenta ku ta pidi pa famianan keda kas mas tantu posibel i esaki lo oumentá konsumo di awa i koriente di famianan
  • Kompensashon pa esnan ku a pèrdè trabou pa motibu di e situashon aki
  • Dispensashon di 3 luna pa pago di kualkier tipo di fiansa, sea ta na un banko òf na kualkier otro instansia òf negoshi partikular
  • Dispensashon di 3 luna pa pago di hür di kas òf apartamento
  • Baha tarifa di rekohé sushi di Selikor bek na 25,= florin pa luna
  • Adaptá tarifanan di telekomunikashon pa fasilitá famianan di por komuniká ku otro

Lamentablemente ta, ku den e pakete ku a keda presentá i no a tene kuenta ku ningun di e puntonan aki. Ku otro palabra no a tene kuenta ku esnan ku a wòrdu afektá tantu sosial i finansieramente dor di e situashon ku Covid-19 a krea.

 

Hopi tata i mama di famia, a pèrdè i lo sigui pèrdè trabou. Hopi problema sosial/finansiero den kasnan di famianan ku ya ta biba den pobresa, kasnan di grandi no a wòrdu ni inkluí den e pakete ku a keda presentá, miéntras ku nos hende grandinan ta esnan mas vulnerabel si nan wòrdu kontagiá ku e vírus aki.

 

Un pakete, kaminda gabinete Rhuggenaath ta duna insentivo fiskal na empresanan ku e meta pa e empresanan mantené “kuponan di trabou mas tantu posibel”, lokual e Minister di finansa a deklará tekstualmente durante di e konferensia di prensa.

 

Kon gobiernu ta bai kontrolá ku si di bèrdat e empresarionan a hasi uso di e fasilidat nan fiskal aki pa mantené e kuponan di trabou? Kon ta posibel ku gobièrnu ta duna eksonerashon di  O.B. i otro fasilidatnan fiskal na empresanan den e ramo di turismo pa nan keda ku mas kèsh pa por paga trahadónan, miéntras ku no tin turista pa hasi uso di nan servisionan te pa nan por generá O.B..

 

Ta bon ku ta buska alivio pa empresarionan, pero frakshon di MFK no ta mira den e pakete aki ku a buska alivio pa esnan mas afektá. Ta p’esei gobièrnu mester a presentá un pakete kaminda e alivio ta yega direktamente serka esnan afektá i/òf un pakete kombiná ku ta yuda e siudadano i e empresario sobrebibí.

 

Ta gobièrnu su tarea den e situashon aki pa salbaguardiá interes di kada siudadano di Kòrsou, pero e forma ku a hinka e pakete aki den otro gobièrnu ta skùif su responsabilidat i pone esaki riba lomba di e empresarionan.

 

Frakshon di MFK no por duna gabinete Rhuggenaath e espasio ku na kuminsamentu di e vírus di Covid-19 nos frakshon a duna nan pa dediká tur nan tempu i atenshon na e Pandemia aki. Miembronan di frakshon di MFK ta haña nan mes obligá pa kuminsá trese dilanti doló i problemanan ku siudadanonan, ku ta yama nos Parlamentarionan pa informá gabinete Rhuggenaath di nan. Nos ta floho di kere ku e doló i problemanan aki no a yega na orea di gabinete Rhuggenaath.

 

Ta p’esei frakshon di MFK lo bai pone preshon i rosea kayente riba gabinete Rhuggenaath, pa esnan mas afektá i esnan ku ta biba den pobresa risibí e yudansa ku komo siudadano di e pais aki tin derechi riba dje.

 

Si na nos ruman nan den Reino ta posibel pa yuda esnan mas afektá, na Kòrsou tambe mester por i frakshon di MFK lo bai bringa ku alma i kurpa pa pueblo di Kòrsou su derechi.

 

Movementu Futuro Kòrsou ta solidario ku pueblo di Kòrsou. Uní i kumpliendo ku tur e instrukshon nan, Kòrsou lo vense Covid-19.

 

Nos no ta akseptá e trato inhustu aki.

 

Kòrsou 24 di mart 2020,

 

Charles Cooper

Miembro di Parlamento

pa frakshon di MFK

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: