Frakshon di MFK kier felisitá tur esnan, ku no por keda kas i tin ku laborá den e tempunan difísil aki pa duna pueblo di Kòrsou e servisionan públiko

Frakshon di MFK kier felisitá tur esnan, ku no por keda kas i tin ku laborá den e tempunan difísil aki pa duna pueblo di Kòrsou e servisionan públiko

 

Frakshon di MFK pa medio di esaki kier, mustra kombibensia ku tur esnan ku ta laborá den e diferente sektornan ku mester keda aktivo pa por duna pueblo di Kòrsou e servisionan ku nos ta dependé di dje.

 

Danki na prinsipalmente nan tur esnan ku ta laborá den e sektor di enfermeria i kuido, na tur nos dòkternan, enfermera i enfermero nan. Na tu ku ta kuida nos grandinan na e diferente kasnan di hende grandi. Bosnan ta e piesa di mes importante pa yuda nos dushi Kòrsou pa e vírus aki no sigui kontaminá otronan.

 

Un danki spesial na miembronan di nos kuerpo polisial, danki pa sirbi i protehá nos komunidat den e momentonan difísil ku pais Kòrsou ta pasando aden. Danki pa instruí pueblo pa kumpli ku órden públiko i e medidanan ku kada un di nos mester sigui pa no wòrdu kontaminá.

 

Nos no por keda sin menshoná esnan ku ta laborá den enseñansa, ku ta hasiendo un tremendo trabou pa for di kas duna edukashon na nos yunan. Danki na bo(so) tambe.

 

Kada un di bosnan ta sakrifikando bo(so) famianan pa por sirbi nos pais i esaki ta algu ku nos di Frakshon di MFK ta apresiá masha hopi mes i nos kier deseá bosnan forsa i sabiduria den ehekushon di bosnan trabou.

 

Aparte di e tres gruponan ku nos a menshoná den e komunikado aki, nos sa ku tin hopi mas siudadano ku ta laborando diariamente i bosnan tambe meresé tur mérito. Bosnan a i ta demostrando ku bosnan ta un Bon yu di Kòrsou i frakshon di MFK pa medio di Parlamentario Juniël Carolina kier gradisí i felisitá kada un di bosnan.

 

Ku Todopoderoso protehá i kuida bosnan i boso famianan, nos lo superá e Pandemia Covis-19.

 

Kòrsou 25 di mart 2020,

 

Juniël Carolina

Miembro di Parlamento

pa frakshon di MFK

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: