RDK TA AKLARÁ E PASONAN KU SINDIKATONAN I REFINERIA ISLA MESTER TUMA PA PAGO DI REDUNDANSHA NA ÈKS TRAHADÓNAN DI REFINERIA POR TUMA LUGA

RDK TA AKLARÁ E PASONAN KU SINDIKATONAN I REFINERIA ISLA MESTER TUMA PA PAGO DI REDUNDANSHA NA ÈKS TRAHADÓNAN DI REFINERIA POR TUMA LUGA

Willemstad  30 di Mart 2020 – Refineria di Kòrsou (RdK) a tuma nota ku tin informe robes ta sirkulá tokante kon parti di e pago di redundansha na èks trahadónan mester konkretisá pa kaba, ya e èks trahadónan por disponé di nan sèn. Gran parti di e informe robes ta  basá riba e echo ku sea partidonan no ta komprondé e asuntu, òf ta purba skonde falta di tomo di desishon. P’esei RdK ke aklará esaki pa komunidat engeneral, pero prinsipalmente e èks trahadónan di Isla.

Pa motibu di sanshonnan Merikano, no ta posibel mas pa komersialisá produkto petrolero Venezolano riba merkado internashonal sin mas. Ta danki na e aplikashon pa eksonerashon ku RdK, CRU i Curoil a hasi den konhunto, ku awor ainda ta posibel ku aki na Kòrsou i na Boneiru nos por komersialisá produkto Venezolano pa nos benefisio lokal. Mester suprayá ku ta netamente RdK a hasi posibel ku pago di redundansha na personal por tuma lugá, sinembargo den henter e proseso pa yega na pago mes, RdK no tin nada di haber. RdK na vários okashon netamente a trata di fasilitá sindikatonan pa e proseso por kana rápido, ofresiendo asistensha i splikashon.

Mester bisa ku ta for di Sèptèmber aña pasá tabata kla pa tantu sindikatonan komo Isla ku despues di 15 di yanüari 2020 ta imposibel pa Refineria Isla òf PDVSA por risibí sèn di benta di produkto ku  Isla tin almasená, basá riba e sanshonnan imponé pa Merka riba PDVSA. Na 22 di novèmber 2020 OFAC a bolbe enfatisá ku benta por tuma lugá, pero sin ku sèn por subi riba kuenta di PDVSA òf Isla. Pa e motibu aki, benta di produkto lo mester sigui un proseso ku ta bai via di un tersero ku ta risibí e sèn di benta i repartí esaki na benefisiarionan. 

Na promé lugá e sindikatonan APRI i PWFC huntu ku Refineria Isla  mester apuntá un entidat imparsial, esta un “entidat tersero”.E entidat aki mester ta unu neutral. Ke men e no por ta e kumpradó ni e sindikatonan, ni Isla. E entidat mester kumpli ku reglanan stipulá pa OFAC.  E reglanan aki ta konosí pa sindikatonan i mester por hasi kòntròl finansiero riba e entidat. Asina tin e entidat apuntá, ta pidi OFAC e ora ei pa aprobá e entidat aki. 

Na di dos lugá, despues di aprobashon pa OFAC, Isla ta manda e kuentanan ku mester keda pagá pa e entidat apuntá, esta Isla ta manda e lista di trahadónan i kuantu mester paga kada trahadó.

Na di tres lugá Isla ta traspasá e produkto ku e ke bende pa e “entidat tersero”.  Esaki ke men ku Isla ta duna e entidat tersero e lista di e volúmen pues e kantidat di e produkto. Na mes momentu ta indiká den kua tanki e produkto ta.

Na di kuater lugá e entidat ta bende e produkto. E parti aki ta inkluí un inspekshon independiente di e produkto.  Un broker lo asistí e entidat ora di hasi e benta.

Na di sinku  lugá e kumpradó ta paga e entidat tersero pa kompra di e produkto riba e kuenta ku e entidat ta indiká, ku no ta di PDVSA ni di Isla.  Manera e sèn subi e kuenta di e entidat tersero, por kuminsá move e produkto i karga barku.

I na di seis i último lugá, mesora e entidat tersero ta paga trahadónan e parti di redundansha ku kada trahadó meresé.  Den esaki ta tene kuenta ku retenshon obligatorio.

E proseso ta mustra kompliká pero e por bai hopi lihé, si esnan responsabel aktuá lihé. Pues ta na sindikatonan PWFC i APRI i Isla pa tuma e pasonan nesesario pa èks trahadónan di Isla por haña nan redundansha ku nan meresé mas lihé  posibel na un manera legal. Ta un kuestion di tomo di desishon segun e reglanan stipulá pa e proseso por kana. E desishon ku tin ku tuma no ta di RdK. 

RdK ta spera di e forma aki di a aklará e proseso i ku e partidonan responsabel ta  dal e pasonan nesesario mas pronto posibel afin ku trahadónan di èks Refineria Isla por haña e siguiente parti di nan pago di redundansha manera akordá entre sindikatonan i Refineria Isla.