Alohamentu sentral pa residentenan ora di repatriashon
Alohamentu sentral pa residentenan ora di repatriashon
E brote di e vírùs di corona tin komo konsekuensia ku un kantidat grandi di residente ta pegá den eksterior. Despues di reuní i klasifiká e residentenan ku ke regresá Boneiru, a traha duru riba un guion pa repatriashon. E residentenan mester por regresá na un manera responsabel i seif. Pa e motibu ei EBT a konstruí un ‘taskforce’ pa elaborá riba e preparashon.
E vírùs di corona ta komportá su mes impredisibel.P’esei ta importante pa por ‘schakel’ di manera flèksibel durante e preparashonnan. E konosementu médiko tokante e vírùs di corona ta desaroyá diariamente. Tin kontakto estrecho ku RIVM i ku otro spesialistanan médiko. RIVM a konfirmá ku por traspasá e vírùs for di un òf dos dia promé ku tin síntoma. E ora ei ya e ta den nanishi òf garganta, sin duna síntoma. Ta apliká e perspektiva nobo aki, i posibel perspektivanan siguiente, den tumamentu di desishon rondó di e guion pa repatriashon.
E desishon tumá te ainda ta ku e promé repatriashon di un grupo di persona ku funshonnan vital, lo tuma lugá riba 14 di aprel próksimo. Lo repatriá nan solamente si nan ta disponé di un deklarashon di salú. Seguidamente nan ta bai den karentena obligatorio na un sitio sentral. Ta duna e repatriantenan klaridat tokante e kondishonnan, e grado di seguridat, mantenshon i sanshon. Promé ku biaha, nan mester firma e kondishonnan. Lo hasi uso di un asina yamá sistema di ‘buddy’, pa sostené e repatriantenan mas mihó posibel. E buddy nan aki ta mantené un protokòl estrikto enkuanto distansia sosial i higiena. Ta evaluá e promé vuelo di repatriashon promé ku e siguiente grupo di repatriante ta sigui.
For di e ‘taskforce’ i EBT ta hasi lo máksimo pa repatriá e residentenan di un manera seif i sigur. E insiguridat ku ta eksistí tokante e repatriashon aki, ta skuchá, pero ta pidi pa laga e trabou na ekspertisio di e personanan enkargá. Supervishon i Mantenshon ta bou di guia di kadena di seguridat. Dòkternan i Departamentu di Salubridat Públiko tin algun tempu kaba trahando riba e preparashonnan. Na nivel atministrativo ta pisa i inkluí konseho di diferente eksperto den e toma di desishon.
Gezaghèber Edison Rijna:
“Mi tin komprenshon pa e gran kantidat di pregunta, pero tambe mi ke hasi un yamada na boso pa mantené trankilidat i demonstrá union. Pasó ta trata di un grupo di residente, konsiudadano di nos isla, for di diferente kapa sosial. Nan tin derechi di regresá. Bo por konfia ku ta tuma kada desishon riba e tema aki, na un manera bon konsiderá i ku lo realisá esfuersonan kontinuo pa kuminsá ku e repatriashon di manera efisiente i responsabel.”