Site icon KIKO TA PASANDO NOTISIA I INFORMASHON

PARLAMENTARIO PLET: INTRODUKSHON DI “HEFFING” TIN SU EFEKTO RIBA KASNAN DI FAMIA.

Advertisements

PARLAMENTARIO PLET: INTRODUKSHON DI “HEFFING” TIN SU EFEKTO RIBA KASNAN DI FAMIA.

 

Kòrsou ta pasando den momentonan difísil despues ku mundu i nos a keda konfrontá ku e situashon di Corana Vírus Covid-19. A base di e situashon aki Gobièrnu di Kòrsou a tuma diferente medida pa atendé ku e aspektonan di salubridat i seguridat di nos pueblo. Komo representante di pueblo nos ta aploudí e manera kon Gobièrnu konhuntamente ku su ekipo ta atendé e situashon pa mantené bou di kòntròl. Un palabra di felisitashon na Gobièrnu pa esaki. Ademas mi ta kontentu i ta sostené e kaminda pa brinda yudansa na nos pueblo , sigur pa  esnan kua keda afektá pa e medidanan tuma pa tene e kantidat di kasonan di COVID-19 abou.

 

Manera ta konosí, e situashon aki ta trese problemanan sosial ekonómiko pa nos pais, kual tambe mester wòrdu atendé. Gobièrnu a pidi yudansa na Gobièrnu di Reino/Hulandes pa asistensia finansiero pa kubri e pakete di sosten presentá i tambe likides pa gobièrnu su presupuesto. Pa tur hende ta konosí kaba kiko ta e desishon di Gobièrnu di Reino pa loke ta e petishon di Gobièrnu di Kòrsou. 

 

Den diskurso nashonal di Minister Presidente di dia 12 aprel último Minister presidente a menshoná e parti pa introdusí un heffing pa persona ku ta den loondienst pa asina Gobièrnu yega na fondo pa atendé situashon aktual.

 

Mi opinion i pensamentu relashoná ku esaki ta ku e heffing menshoná, lo tin un impakto sosial ekonómiko aun mas negativo riba diferente kasnan di famia. Esaki mirando ku den diferente kasnan di famia sea un òf miembro di e famia su entradanan a kai afó mirando e situashon aktual. Ekonómikamente e famianan aki nan forsa di kompra a bai atras drástikamente. E situashon aki ta trese  kuné ku diferente kasnan di famia tin un (1) entrada so pa mantené kabes riba awa i pasa dor di e situashon aki te na momento kosnan normalisá. Un heffing lo suak aun mas e entrada di e famia ku lo redundá den un korte mas den e forsa di kompra. 

 

Konforme artíkulo 96 di reglamento di reglamento di òrdu Parlamentario sr Yaël Plet a hasi e siguiente preguntanan dirigí na Minister:

 

  1. Gobièrnu ta konsiente di e situashon sosio ekonómiko mirando e diferente kas di famia a pèrdè entrada?
  2. Ki ta loke Gobièrnu kier generá si dado kaso introdusí Solidariteitsheffing?
  3. Ki ta e porsentahe ku gobièrnu tin pensa pa e solidariteitsheffing?
  4. Esaki ta e úniko pensamentu i solushon ku Gobièrnu tin pa loke ta haña fondo?
  5. Gobièrnu tin den mente kon lo atendé ku e preshon ku diferente kasnan di famia lo ta aden si introdusí e heffing aki?
  6. Den situashon ku desempleo por subi te riba 60%, Gobièrnu por laga CBCS hasi un kalkulo di e impakto si introdusí un solidariteitsheffing awor aki?
  7. Gobièrnu ta kompartí e punto di bista di IMF ku un redukshon di forsa di kompra awor aki ta funesto pa ekonomia di Kòrsou i ku implementashon di solidariteitsheffing ta igual ku redukshon di forsa di kompra di esnan den ‘loondienst’?

 

Komo miembro di e komunidat aki nos ta komprondé e situashon i ta solidario pero semper den mente pa mantené e balansa i sosten na komunidat. 

Nos mester mira e oportunidat aki pa fortifiká, rediseñá nos ekonomia i simplifiká nos sistema di impuesto. Ku e mira pa Gobièrnu fasilitá aun mas desaroyonan den nos pais ku ta multipliká den entrada pa pais i pan riba mesa pa nos pueblo. 

Exit mobile version