Schooltv disponibel ariba canalnan di islanan Hulandes den Caribe

Schooltv disponibel na Aruba y otro islanan Hulandes den Caribe

Pa algun aña caba, Telearuba a busca pa contribui cu contenido audiovisual na Hulandes pa e muchanan na Aruba. Na Hulanda tin varios programa educativo na Hulandes cu no tabata accesibel facilmente pa Aruba y e otro islanan, debi na derechonan di autor y gastonan hopi halto di licencia.

Na momento cu e crisis a cuminsa, Telearuba a bolbe acerca su contactonan na Hulanda y conhuntamente cu Arubahuis a bati na porta di Ministerio di Onderwijs, Cultuur en Wetenschappen na Hulanda, pa hunto bolbe acerca NPO/NTR/Schooltv (Zapp tv) y BVN, pa contribui cu nos muchanan cu ta na cas pa motibo di e crisis y cierre di tur scol.

E encuento recientemente via internet cu NPO/NTR y BVN, hunto cu Arubahuis y OCW tabata uno sumamente positivo. No solamente e lo beneficia Aruba, pero tur 6 isla di e ex constelacion di Antiya Hulandes. Na final di e reunion a keda e boluntad pa papia riba un cooperacion mas amplio y extenso despues di e periodo di crisis.

Telearuba lo complementa e contenido di NPO/NTR via BVN, cu produccionnan local, danki na e cooperacion cu Ministerio y Departamento di Enseñansa, Directivanan di Scol, Stichting Arubaanse Schoolorkest, Fortalesa Montessori y lo agrega mas instancia cu a mustra interes pa contribui pa Aruba- via Telearuba -tin su mesun canal di educacion.

Lo uza canal 23 ariba cable (Siña mi tv) pa e iniciativa aki y a cuminsa diamars 28 di April 2020  pa 8:20 am cu un mensahe di Minister di Enseñansa Sr. Rudy Lampe. Tur dia den siman pa 8:30 te cu 10:30 am lo tin contenido nobo di Schooltv na Hulandes sigi pa contenido local y e mesun programmanan lo wordo ripiti di 1:30 pa 3:30 pm, contenido Hulandes y un biaha mas sigi pa contenido local. Telearuba lo ripiti e contenido den weekend, cual ta contenido cu a pasa den siman.

Telearuba ta sumamente contento di por contribui y asina duna contenido na su lema di INFORMA-EDUCA y ENTRETENE. Danki na tur cu a forma parti di e tremendo proyecto aki, e Team di Telearuba cu hunto cu e docentanan local cu ta forma parti di producción local cu pronto lo wordo transmiti.

Adhunto e link di e pressrelease di NPO/NTR y BVN conhuntamente cu Aruba, ariba e tópico aki.

Link:

https://pers.npo.nl/publicaties/educatieve-programmas-npo-zapp-en-schooltv-via-bvn-te-zien-in-caribisch-gebied

This site uses Akismet to reduce spam. Learn how your comment data is processed.

%d bloggers like this: