Honor na nos baluarte sr. Pedro Celestino (Shon Pe) Hooi

May 19, 2020 REDAKSHON

Honor na nos baluarte sr. Pedro Celestino (Shon Pe) Hooi

Geplaatst op 18 May 2020 dor di Ministerio Enseñansa, Siensia, Kultura & Deporte

Riba su fecha natal 19 mei E ta keda Honrá.

Willemstad – Resientemente Gobièrnu di Kòrsou a tuma nota di fayesimentu di Pedro (Shon Pe) Hooi i no ke laga e oportunidat aki pasa sin pone atenshon na nos baluarte kurasoleño i digno representante di nos nashon. Di diferente forma ta duna rekonosementu na nos mes hendenan paso ta nan ta nos ‘role model’nan di nos futuro generashonnan. Sr. Pedro Celestino Hooi nansé 19 di mei 1941, mihó konosí komo Shon Pe un deportista kurasoleño ku semper a representá i saka kara di nos nashon komo un digno representante den vários área di deporte i alabes a guía i ‘coach’ hóbennan.

Shon Pe Hooi ta un digno habitante di Banda Abou ku a keda eduká na Sint Jan School i despues a pasa pa sigui su M.U.L.O. na Sint Thomas College. For di edat hóben e tabata gusta e ramo di deporte i dunamente di guia na muchanan. For di aña 1969 Shon Pe Hooi a kuminsá komo entrenadó den e deporte di Bòkseo. El a train eks-kampion mundial José Legra i asina tambe el a train vários bòksdó mas den e ‘Team Fighting Mack’, i asina su trayektora a kuminsá den ramo di bòkseo na diferente pais manera, Kolombia, Kòrsou, Mexico, Italia, Spaña i mas. Tambe el a traha komo promotor i ‘matchmaker’ huntu ku sr. Angel (el Gordito di Oro) Job i asina konkistá vários título huntu ku vários integrante manera: Frenk Albertus, Ivan Samuco, Chichi Zimmerman, Papi Palm, Fleco Sony, Baba Guami, Shoma Isidora, Ibi Zimmerman i Frenk Martina. Otro tremendo aktividat ta ku na aña 1992 Shon Pe a organisá training di futbòl pa e bishita di “El Rey Pele’ na Kòrsou.

Na aña 1978 Shon Pe a haña oportunidat pa traha komo lider deportivo na fundashon Servisio di Deporte i Rekreashon Kòrsou (SEDREKO). El a duna guia den ramo deportivo manera Bòkseo, Futbòl, Baseball, Softball i Slagbal. Trahando na SEDREKO el a sa di dediká hopi tempu i energia na nos hóbennan di e barionan manera Soto, Barber, Santa Krus, Lagun, Westpunt, Tera Kòrá i Willibrordus. Durante di e momentunan aki Shon Pe a ripará ku e tabata tin mas talento i asina el a aportá na vários okashon organisando kampionato i forma parti integral di teamnan di futbòl, baseball i softball. Den e skema anekso por tuma nota di tur e triunfonan durante di e aña 1976 te ku 1991.

Alabes Shon Pe tabata un suidadano ku semper a prepará su mes di forma profeshonal pa duna su aporte i guia na nos hóbennan. El a sigui diferente training i lèsnan den eksterior manera na aña 1970 na Spaña el a sigui su promé kurso huntu ku eks-kampion mundial, sr. José Legra. Semper e tabata mustra riba e importansia di disiplina, responsabilidat i rèspèt den kombinashon ku edukashon i prestashon na skol ku ta di sumo importansia pa futuro serka tur hóben i mucha. Hubentut engeneral semper el a karga den su kurason pero espeshalmente e hóbennan di Banda Abou. Komunidat di Banda Abou tambe semper a biba den harmonia ku Shon Pe i el a gosa di rèspèt di e hóbennan semper.

Aña pasá E sentro Multi-funshonal na Barber a keda honrá ku nòmber di Shon Pe. Durante di e apertura ofishal Shon Pe a hiba palabra i gradisí tur presente i tabata hopi kontentu ku Gobièrnu ta traha pa pueblo di Banda Abou. Tambe Shon Pe a keda honrá komo baluarte na aña 2014 ku e kondekorashon Krus di Mérito i tambe el a keda kondekorá dor di Kas Real di Reino Hulandes pa su aporte na konstukshon di suidadania di Reino Hulandes den e ramo di deporte.