Spich señora Chris de Vogel

Medio mart Boneiru tur atenshon na Boneiru tabata dirigí riba corona. Awor ku nos ta mitar di luna di mei nos ta den un otro fase. Un fase den kua ta wak kiko por suavisá sin pèrdè siguridat di nos salubridat for di bista. Aki ratu mi ta konta boso mas di esei.

E situashon den sifra;
Te na komienso di e siman akí a hasi 293 tèst, 291 tabata negativo i 2 positivo ku ya a kura. Na e momentunan akí tin 99 persona den karentena. Salubridat Públiko ta keda tèst, despues di awe tambe, pa por intervení mas tempran posibel si resultá ku esei ta nesesario!

Nos a yega den e fase di mitigashon, loke no ta nifiká nada otro ku suavisashon. Den konteksto di e brote di e vírùs i for di perspektiva di salubridat esei ta nifiká ku na e momentonan akí nos ta asina leu pa kambia e medidanan ‘fuerte’ den medidanan moderá.

Kiko esei ta nifiká:
Paso pa paso nos ta riba e kaminda pa anda ku otro di otro forma; esta ‘Corona smart’. Nos sa ku e vírùs no ta aktivo riba e isla na e momentunan akí. Salubridat Públiko ta keda traha huntu ku Fundashon Mariadal i dòkternan di kas pa keda vigilá si tur kos ta bai bon. No pasobra tin hende malu na e momentunan akí, pero pa keda vigilá si e vírùs ta riba e isla i si ta asina na unda e ta.

Ta asina tambe ku huntu nos tin e responsabilidat pa protehá esnan vulnerabel i nos grandinan optimalmente kontra posibel yegada di e vírùs. Esaki un prioridat di nos tur. Ta bon pa realisá ku siensia ainda ta investigando e vírùs. Nos no sa tur kos di dje ainda. Kontinuamente ta sali konosementu nobo ku mester keda tradusí den akshon. E tantísimo notisianan falsu i teorianan di konspirashon ku ta sirkulando, ta pone ku ta un reto pa trese balanse den esaki. Nos no sa sufisiente ainda di e vírùs, por fabor, no kere tur kos ku boso topa den diferente medio rònt mundu. Pone esaki konstantemente banda di e fase ku Boneiru ta aden na e momentunan aki, esei ya kaba ta hasi hopi diferensia den e emoshonnan ku tur esaki ta trese kuné.

Nos ta keda tene tur hende ku bin di eksterior den karentena.
Mi kier pidi tambe komprenshon pa boso bisiña ku tin ku bai den karentena i mester keda 14 dia den kas i den su mes kurá. Nos ta pidi e mes komprenshon pa e personanan ku ta den un lugá di karentena sentral.

E personanan aki – meskos ku boso – no ta malu! Pero nan ta bin di pafó di Boneiru i ta keda paden te ora ta probá ku nan no a importá e vírùs. Mi ta pidi komprenshon pa e sakrifisio enorme akí ku nan ta hasi pa keda 14 dia den isolashon, pa tene nan mes i Boneiru salú. Laga nos ta orguyoso di nos kohabitante di e isla akí. No huzga nan!

No bai hunga pa polis i no usa facebook komo kódigo penal. Pensa ku despues di 14 dia ta posibel pa tin kontakto normal atrobe i ku nos tin ku sigui biba amikalmente i den harmonia ku otro.

E reglanan di kondukta ku nos a formulá ku otro ta keda na vigor;
Laba bo man ku habon i awa, tene distansia apropiá = distansia apropiá ta 1,5 meter. Tosa òf nister den èlebog. Usa lensu di papel i tira esaki afó asina kaba us’é.

Dikon nos mester tene nos mes na e reglanan di kondukta miéntras COVID-19 no ta aktivo riba e isla?
Nos tabata hasi esaki anteriormente pa tene nos estriktamente na e reglanan di RIVM, pasobra tabata por a spera ku e vírùs lo a yega riba nos isla, meskos ku na paisnan rondó di nos i na Oropa.

Awor nos ta hasié pa prepará pa e medidanan di suavisashon ku poko poko nos ta bai tuma, pa por rekreá atrobe i riba término habri pa turismo.

Aseptashon di e reglanan akí pa término largu ta sòru pa nos ta prepará pa loke – den forma leve- ta bin pa nos. E vírùs un dia lo hasi su entrada di bèrdat riba e isla, esei tambe ta algu ku nos komo pueblo tin ku aseptá. Importante ta ku nos por anda bon ku esaki. Dor di tene nos mes na e medidanan di higiena i di distansia apropiá nos ta evitá ku e vírùs ta plama ampliamente ora e drenta. Ta na boso pa anda kouteloso ku esaki.

Salubridat Públiko pa medio di komunikadonan di prensa lo tene boso na altura e periodo benidero di e situashon di salú riba e isla i si ta nesesario, papia durante konferensianan di prensa.

Mi ta finalisá ku;

· E petishon na nòmber di dòkternan di kas, hòspital i sekshon di Salubridat Públiko, pa na bienestar di boso salú, sigui e reglanan akí.

· Keda salú i mi ta gradisí boso pa boso atenshon.