Gobierno di Aruba: AWOR TA MOMENTO PA SOLIDARISMO, NO EGOISMO

Gobierno di Aruba:

 

AWOR TA MOMENTO PA SOLIDARISMO, NO EGOISMO

 

Gobierno di Aruba ta haci un apelacion fuerte riba sindicatonan pa ta solidario cu 37 mil famia cu a keda sin entrada den e crisis aki. E accionnan planea ta señal di egoismo y mester wordo rechasa. 

 

Corona-crisis a dal henter mundo y aki na Aruba nos ta sinti e efectonan mas severamente. 80% di entrada di pais Aruba a cay afo. Cu esaki 80% di salario di empleadonan publico ta core peliger. 

Gobierno di Aruba ta trahando incansablemente pa baha su gastonan y pa presta placa pa asina por evita cu sea mester corta 80% den salario di tur empleado publico, of mester kita 80% di empleadonan publico for di trabou. 

 

Den esaki a haya e posibilidad di presta placa na Hulanda, sin mester paga interes. Pais Aruba mester paga tur e placa aki bek si aki dos aña. 

 

Hulanda den e proceso a pone algun condicion. Condicionnan cu Gobierno di Aruba a anticipa y desde luna di maart ta den deliberacion cu gremionan riba dje. 

Pa loke ta e cortamento den salario di empleado publico, esaki ta masha logico. No por ta asina cu miles di famia ta perde 100% di nan entrada y otronan ta exigi pa mantene 100% di nan entrada siendo cu no tin placa pa nan. 

Gobierno a pidi empleadonan publico pa entrega 5% di nan salario di tur luna, mas mita di e vakantieuitkering otro luna, mas mita di e premie di december. Pues total 12.6% como muestra di solidaridad. 

Minister y Parlamentarionan ta entrega 25%, double e suma ey. 

 

Gobierno ta compronde cu ta duro pa entrega salario. Pero e ta necesario. Nos ta den crisis. 37 mil hende lo perde trabou. Gobierno ta manteniendo awor 20 pico mil famia. 

Esaki no ta momento pa egoismo. Esaki ta momento pa solidarismo. 

 

ACCIONNAN DI SINDICATO TA PERHUDICA EMPLEADO PUBLICO

Sindicatonan a tuma varios accion caba cu a perhudica e empleado publico. Entre otro cu nan accion di bay entrega keho na VNO, a conduci cu aparte di entrega salario, awor Hulanda ta exigi pa para indexering tambe. 

 

Sindicatonan SEPPA y SIMAR a anuncia un otro accion diaranson awor, dirigi segun nan riba e hecho cu Gobierno no a consulta cu nan prome cu a acepta e condicion adicional di Hulanda pa baha gasto di AZV. 

 

Ta importante pa señala cu Gobierno di Aruba y Parlamento di Aruba ta trahando pa un tempo caba riba rebaho di gasto di AZV. Pues e condicion adicional di Hulanda tocante AZV, no ta nobo. 

E ta dificil si, especialmente den tempo di crisis. 

Pero ta importante pa sindicato realisa cu si nos no a acepta e condicion, no lo tin placa pa paga salario di ambtenaar otro siman ni otro luna. Tampoco lo tabata tin placa pa hinca den e fondo di AZV ni SVB. 

 

Gobierno a acepta e condicion mesora pa garantisa salario di empleado publico, y pa garantisa contribucion na e fondo di AZV. 5 miyon florin, apesar cu e ta hopi duro pa entrega awor, bou e circumstancianan aki, ta lo minimo. Esnan cu ta realisa cu nos ta den crisis si ta realisa esey. 

 

E accionnan di sindicatonan SIMAR y SEPPA ta mustra mas bien cu nan no ta realisa e embargadura di e situacion cu nos ta aden, y ta mustra egoismo. 

 Gobierno ta haci un apelacion riba e sindicatonan aki pa mustra solidarismo, no egoismo.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: