Relato di un enfermera Kurasoleño na Hulanda.  

Su eksperensia ku COVID-19.

Mi nòmber ta Farline Rodriguez. Mi ta un verzorgende IG, ku ta laborando na Hulanda, ku ta duna kuido den verpleeghuisnan aki na Hulanda. Den e ultimo 2 luna i mei aki mi a traha den un verpleeghuis ku lamentablemente a keda konfrontá ku hopi di nan habitantenan a wòrdu infektá ku COVID-19. Mas ku e mitar di e habitantenan tabata malu i lamentablemente no ta tur por a kombatí e malesa aki.

Mi eksperensia ku COVID-19.
Nunka mi a mira un malesa traishonero asina aki, e malesa aki ta unu ku a pone tur persona ku ta traha den kuido igual, pasobra ni e dòkternan di mas haltu te awe no tin un kotesta pa e malesa aki, ni un solushon p’e.

Nos ku ta traha den verpleeghuis aki na Hulanda kasi no tabata tin sufisiente material pa nos traha ku n’e, ni tampoko e material adekuá, pero tòg nos a sigui traha i duna e kuido ku nos tabata por na nos habitantenan. Hopi di mi koleganan a bira malu. Kasi mitar di e personal tabata malu ku COVID-19, asta dòkternan a bira malu.

Ami a traha mas di lo normal, kasi mi no tabata tin dia liber. Bo tabata sa ki ora bo ta kuminsá, pero bo no tabata sa ki ora bo ta kaba. Bo ta mira bo habitantenan sufri, kada un di nan na nan manera, tabata tin dia ku asta dòkternan no tabata sa mas ki nan ta tin ku hasi i nan tabata pidi nos nos opinion i kiko nos ta kere lo ta mihó pa hasi. Hopi di nos tabata hopi kansá pasó e kuido no ta esun ku normal bo sa duna. Esaki ta un kuido aun mas avansá. Bo tabata mira kon e habitantenan tabata tin miedu, nan no por hala rosea, nan tabata pidi hopi atenshon. Famianan preokupá tabata yama kada ora pa sa kon ta sigui ku nan ser kerí.

Dor di menos personal nos a yega na un dado momentu di hasi uzo di personanan ku normalmente no sa duna kuido, pero ku si ta traha ku nos, manera personanan ku sa drecha pan pa e habitantenan, pa nan yuda nos den kuido pasó hopi zuster a bira malu i nos tabata tin mester di hende pa yuda nos.

Ami na varios okashon a tuma kontakto ku hopi persona ku ta traha den kuido na Kòrsou pa alertá nan di e kosnan aki. Pa nan buska personanan ku lo por asistí nos spesialistanan ku ta traha den kuido na Kòrsou pa si algu asina aki mester yega pasa na nos pais. Mi a asta solisitá pa mi por traha i duna mi pais un man ku tur e eksperensia ku mi tin ku COVID-19, pero loke mi tabata tende kada bes ta, ku ta spesialista nan ta buskando. Portá mi no tin tur e papelnan ku nan ta pidi pa traha ayanan, pero kere mi ku COVID-19 no tin spesialista. Ta mas bo traha aden,  mas bo ta siña atendé ku e malesa aki i kon bo tin ku duna kuido, i esei ami tin.

Por ultimo mi ke bisa:
SI bo no pone balansa den bo kuido ku personanan di tur nivel ku sa duna kuido, e grupo ku bo tin ta wòrdu overbelast hopi mas lihé di loke bo ta kere pasó e kuido ku bo ta duna na e personanan aki no ta e kuido ku normalmente nos ta duna, sino unu muchu mas intensivo.
Mi ke pidi pa no lubidá riba tur e lugánan ku tambe ta duna kuido aparte di hospital, pasó e grupo aki lo por tin e mas difisil ku hospital mes, pasó serka nan tin personanan ku ta hopi fragil pa ku e malesa aki. Tambe pa e personal ku ta traha den e lugánan aki tambe por tin e material nesesario pa nan por hasi nan trabou sin miedu.

Mi ta kere ku si hasi un yamada na personanan ku ta traha den kuido, YUNAN DI KÒRSOU den eksterior, ku tur lo ta kla pa bai yuda nan pais pasó ta hopi nos ta ku lo bai duna un man na nos pais.

NO LUBIDA RIBA NOS GRANDINAN, NI TAMPOKO NOS HENDENAN SPESIAL, PASÓ NAN TAMBE TIN DERECHI.

FARLINE RODRIGUEZ.