Minister President Evelyn Wever-Croes: GOBIERNO TA CUMINSA PROCESO PA OPERADOR Y INVERSIONISTA NOBO PA REFENERIA
Minister President Evelyn Wever-Croes:
GOBIERNO TA CUMINSA PROCESO PA OPERADOR Y INVERSIONISTA NOBO PA REFENERIA
Minister President Evelyn Wever-Croes a informa cu 8 juni 2020 ta cuminsa cu e proceso pa busca un operador nobo pa e referina of inversionista cu kier haci otro inversion. E notificacion publico lo wordo publica 8 di juni 2020 den corantnan local y internacional, y websitenan na Merca y na Europa.
Gobierno di Aruba y RdA ta bay cana 2 proceso di “request for expression of interest” (REOI) parew:
- REOI-1: ta pidi interesadonan pa expresa nan interes den reapertura di refineria of industria relaciona cu refineria y energia, por ehempel LNG, facilidadnan petroquimico, energia alternativo.
- REOI-2: ta pidi interesadonan pa expresa nan interes den cualkier otro tipo di desaroyo (“vervangende industrie”), cu ta genera cupo di empleo y desaroyo economico similar na e refineria.
Den e notificacion publico Gobierno di Aruba y RdA ta stipula e exigencianan claramente:
- E actividadnan nobo mester genera cupo di empleo y desaroyo economico significante
- E actividadnan mester cumpli cu reglanan medio ambiental
- E actividadnan mester cumpli cu e maneho di Reino riba tereno di relacionnan exterior y e maneho di OFAC
Interesadonan tin cu download e formularionan cu ta disponible na http://www.government.aw y eynan lo haya mas instruccion pa cu entrega na notario. Notario ta encarga cu e proceso di entregamento, y lo mantene esaki confidencial te na momento di e deadline. Esaki ta pa garantisa e transparencia den e proceso.
E proceso lo ta como lo siguiente:
E notificacion publico lo wordo publica dia 8 di juni 2020 y tur interesado tin 6 siman pa reacciona y entrega nan oferta. E fecha ultimo pa entrega esaki pues ta dia 17 di juli 2020.
Na e momento ey ta cuminsa e proceso di evaluacion, cu lo dura 4 siman. Pues pa dia 14 di augustus 2020 lo anuncia e resultado di e procedura di expresion di interes.
E structura pa maneha e proceso aki ta como lo siguiente:
Lo tin un comision directiva, consistiendo di Minister encarga cu energia, cu lo institui un comision consehero. Minister ta encarga cu mantene comunicacion cu Parlamento, y lo ricibi na final un proposicion di e comision consehero.
E comision consehero lo ta esun cu lo ehecuta e proceso di expresion di interes, lo evalua tur e ofertanan, pa prepara un conseho pa e minister. E comision aki lo wordo lidera pa un representante di RdA, y lo wordo asisti pa conseheronan riba e area di refineria, finansas, medio ambiente y huridico. Gobierno lo haci uzo tambe di conseheronan internacional, caminda cu ta necesario.
Lo tin un comision di sosten, consistiendo di hefenan di departamento huridico, departamento di medio ambiente, departamento di inspeccion tecnico, departamento di infrastructura, departamento di asuntonan economico y departamento di impuesto. E comision aki lo duna conseho riba e ofertanan y e proposicion di e comision consehero.
E proceso aki ta un proceso transparente cu ta garantisa e integridad den e proceso, y ta cumpli cu palabracionnan haci den e acuerdo di coalicion. Gobierno di Aruba tin tur confiansa cu e procedura aki lo brinda e miho alternativa pa Aruba. Den dos pa tres luna mester tin mas claridad. Gobierno di Aruba y RdA cu esaki ta cuminsa e proceso di destaho publico.
