Minister Xiomara Maduro  a duna presentacion financiero na sindicatonan

Minister Xiomara Maduro  a duna presentacion financiero na sindicatonan

 

ORANJESTAD – Dialuna atardi Gobierno a reuni cu sindicatonan caminda pa duna nan, entre otro, un presentacion di e situacion financiero di Pais Aruba y brinda informacion di e Sosten Financiero cu Gobierno ta duna pa surpasa e crisis economico y financiero causa pa e crisis di COVID19. 

 

Minister Maduro a splica cu e cifranan aki ta e base y e realidad den cual e decisionnan ta wordo tuma na bienestar di Aruba y su hendenan. 

 

Entrada di Gobierno ta cay cada luna mas atras. A premira cu Gobierno lo perde 50% na entrada e aña aki, pero realidad ta mustra nos cu ya na mei 2020 cana nos a bay mas atras cu 50% na entrada. Prima di AZV y SVB tambe ta cay atras y ya caba na e momentonan aki SVB ta usando 11 miyon di nan reserva di 3 luna cu tin cu sigura cu nos Grandinan tin entrada. 

 

E mandatario a subraya cu esakinan ta e cifranan real di Pais Aruba, pues no ta trata di cifra manipula, sino e simpel realidad a base di cual decisionnan mester wordo tuma pa nos Pais no bay perdi.

 

Na final Minister Xiomara Maduro a duna un relato tambe di e sosten financiero brinda pa Gobierno a base di entega di salario di, entre otro, e empleado publico. Di e manera aki e sindicatonan por ta bon informa di e realidad financiero den cual Gobierno di Aruba y su persona como Minister di Finansa mester tuma decision pa Aruba por surpasa e crisis di COVID19.