Premier Evelyn Wever-Croes: Reflexion: ARUBA TA BAY SALI EXITOSO DI E CRISIS AKI

 

Premier Evelyn Wever-Croes: 

 

Reflexion:

 

ARUBA TA BAY SALI EXITOSO DI E CRISIS AKI

Den conferencia di prensa di Gobierno di Aruba dialuna anochi, pa duna informacion di e maneho di Gobierno di Aruba hunto cu expertonan di ‘crisis team’, Prome Minister Evelyn Wever-Croes a enfatisa un biaha mas cu pa nos sali exitoso di e crisis aki, no solamente nos mester mantene nos fe, confiansa y optimismo, pero tambe e participacion di tur ciudadano y instancia den forma solidario ta sumamente importante.

“Aruba ta na un momento hopi crucial di su historia. Nunca antes nos pais mester a paralisa pa mas di 3 luna, perde tur entrada, cera porta pa su bishitantenan y su unico pilar economico y sigui percura pa nos trahadonan y nan famianan por sigui haya entrada. E realidad a cambia pa tur hende y no na Aruba so, pero rond mundo. 

Prome cu e crisis aki a dal dia 13 di Maart, nos pais tabata na vispera di un situacion financiero saludabel. Nos tawata mira un surplus di 40 miyon florin e aña aki, y pa awe nos proyecta cu nos lo cera aña cu un deficit di 1.300 miyon florin. Esaki ta solamente loke nos a proyecta, pero tanten nos no sa kico e gastonan di e crisis aki ta y tanten nos no haña entrada nos no sa kico e deficit lo ta realmente. 

Hulanda ta yudando nos cu prestamo cu berdad no tin interes pero si tin condicion. Aruba su capacidad di paga a debilita debi na e Covid19 y esaki ta bay dura pa un tempo largo. Pues Aruba tin un enorme debe nobo, entrada di Aruba cu a baha 0 y nos tin cu bay sigui fia te ora cu nos por para riba nos propio pia. 

P’esey participacion di tur hende y instancia den forma solidario ta sumamente importante pa awor y e lunanan y kisas aña cu ta bin. Nos no por cambia e realidad aki cu un barita magico, ningun pais por. Awor ta momento pa hunto nos pone man na curason y mira e futuro cu speransa, optimismo y positivismo. 

Siman a habri y Aruba a dal su prome paso den su reapertura habriendo frontera cu nos islanan ruma Corsou y Boneiro. Nos ta yama nos bishitantenan un Bonbini y gradici nan pa bishita nos isla. Poco poco lo habri e frontera pa demas region, continente y paisnan pa asina nos mehora y stabilisa nos situacion financiero. E ta comprendibel cu tin preocupacion, critica. Nos ta gradici pa e elogionan tambe. Pero nos mester mantene nos fe, confiansa y optimismo pasobra Aruba ta bay sali exitoso di e crisis aki”.

This site uses Akismet to reduce spam. Learn how your comment data is processed.

error: Content is protected !!
%d bloggers like this: