Akshon di limpiesa den áreanan afektá pa Sargassum den fase final  

 

Akshon di limpiesa den áreanan afektá pa Sargassum den fase final  

Willemstad – Manera ya ta ampliamente konosí, Kòrsou a eksperensiá atrobe un temporada ku kantidatnan grandi di e alga marino Sargassum a yega nos kosta i a akumulá den diferente bokanan. Momentu ku e Sargassum aki kuminsá putri e ta kousa hopi molèster di holó stinki pa habitantenan di e área. Esaki sigur ta e kaso na entre otro St. Joris, Ascencion i Patrick. E situashon aki ta forma peliger tambe pa turtuga pasobra momentu ku nan drenta den un di e bokanan ku ta kompletamente tapá ku Sargassum, nan no por bini ariba bèk pa hala rosea i nan ta hoga. Entre tantu Ministerio di GMN ya a saka tur Sargassum for di den laman na St. Joris i ta bastante avansá ku e trabounan na otro sitionan.

E akshon di limpiesa ta tuma lugá bou di kordinashon di señor Sharlon Gabriel di AVB (ántes LVV) i den algun dia lo terminá e trabounan na tur e áreanan afektá. Lo pone e Sargassum ku saka for di laman na kantu riba tera pa e seka, pa asina hasi transporte pa Landfill muchu mas fásil. Aktualmente no tin indikashon ku mas Sargassun lo ta biniendo den nos direkshon. Wardakosta ku tin e bista riba laman lo keda monitoriá e situashon i lo mèldu Ministerio di GMN momentu ku esaki ta nesesario. 

No tabatin sentido pa kuminsá limpia sin mas miéntras ku ainda tabatin kantidat grandi di Sargassum ta bini den nos direkshon. P’esei no por a kuminsá mas tempran ku e limpiesa. Ministerio di GMN ta gradisí boluntarionan di Stichting Uniek Curaçao i Sea Turtle Conservation Curaçao (STCC) pa e gran trabou ku nan a hasi di keda monitoriá e situashon i reskatá diferente turtuga ku tabata pegá den Sargassum. Ademas e organisashonnan aki a hasi e trabou den e temporada difísil di “lockdown” relashoná ku COVID-19. Por lo pronto e problema ta solushoná, aunke e chèns ta hopi grandi ku otro aña Sargassum lo presentá atrobe na nos kosta. 

Riba potrèt 1, por mira momentu ku limpiando e área di St. Joris ku entre tantu ta kla.

Riba potrèt 2, por mira momentu ku ta limpiando e área di Ascencion.