CRU SU ATENSHON I ESFUERSO TA FIHÁ DEN SOSTEN NA TRAHADÓ DEN E MOMENTU DIFÍSIL PA E  KOMPANIA I SU TRAHADONAN

 

CRU SU ATENSHON I ESFUERSO TA FIHÁ DEN SOSTEN NA TRAHADÓ DEN E MOMENTU DIFÍSIL PA E  KOMPANIA I SU TRAHADONAN

 

Willemstad 19 di yuni 2020– Djasabra 20 di yüni ta e dia riba kua Curaçao Refinery Utilities (CRU) lo notifiká aktual trahadónan di CRU ken ta keda ofresé un kupo di trabou i ken lo no bolbe bèk na e kompania despues di 30 di yüni próksimo.  Esaki ta marka final di e proseso ku CRU a bini ta ehekutá pa yega na un organisashon nobo di CRU ku ta mas produktivo i sostenibel.  CRU su esfuerso na e momentu aki ta dirigí pa duna mas tantu sosten posibel na tantu e trahadónan ku no ta siguí ku e kompania komo esnan ku ta keda ofresé un empleo ku e kompania despues di 30 di yüni.

 

Sosten sosial na disposishon di trahadónan

P’esei durante di fin di siman aki, lo tin un ekipo di trahado sosial na disposishon di trahadónan i nan famia pa por duna asistensia si ta nesesario.  Durante di henter fin di siman lo por alkansá un trahadó sosial na un di e siguiente numbernan di telefon: 565-0645/ 510-5853/ 525-9816/ 512-2242.  E ekipo di trahadó sosial aki tambe lo ta presente na Rust & Burgh djasabra entre 9’or di mainta i 1’or di merdia.  Kualke trahadó, òf familiar di e trahadó di CRU ku ta sinti e nesesidat, por tuma kontanto ku e ekipo di trahadó sosial na e numbernan indiká.

 

CRU ta kombibí ku trahadónan

Manera ta konosí durante di e último simanan, Gerensha di CRU den e proseso aki a revisá kiko ta e tareanan di CRU i kual ta e mihó struktura pa ehekutá e tareanan den e CRU nobo na un manera efektivo, efisiente i sostenibel. Pa kada funshon a evaluá kon ta e mihó manera pa yena kada stul. A hasi máksimo esfuerso pa kaminda por, duna mas tantu hende posibel, trabou.  

Den e situashon asina aki ta difísil i duru pa hasi eskoho entre hendenan, ku kada unu na nan manera ta bon kalifiká i ku tin un trayektoria di traha duru pa e kompania.  Ounke ku a logra tene hopi hende na trabou, realidat ta tambe ku tin un grupo di trahadó ku awor aki lo mester kuminsá un trayektoria nobo den na karera. Gerensha di CRU, ku hopi duele, ta mira hopi bon trahadó tuma despedida di e kompania.  Gerensha di CRU ta komprondé i kompartí e doló pasombra pa CRU tambe e echo ku e trahadó lo no tei mas ta un pèrdida. Un pèrdida di eksperiensia. Un pèrdida di kapasidat. Un pèrdida di miembro di un famia.

 

Ta sigui ku esfuerso pa konkretisá futuro duradero

Mientras CRU ta drenta e realidat nobo aki, Refineria di Kòrsou (RdK) lo siguí hasi su máksimo esfuerso pa logra konkretisá un futuro duradero pa nos refineria.  Esaki lo nifiká oportunidat nobo pa e grupo di bon trahadónan ku semper a traha den nos industria petrolero.

 

-FIN-