PLAN NACIONAL PA ATENDE CU E PROBLEMATICA DI CACHO NA ARUBA

 

PLAN NACIONAL PA ATENDE CU E PROBLEMATICA DI CACHO NA ARUBA (Parti 3 di 6)

 

CENTRO DI CONTROL DI CACHO

Mas cu 40 aña pasa un facilidad na Wayaca cu den comunidad a haya e nomber di ‘kill cage / afmaakhok’ a wordo introduci na Aruba pa purba atende cu mascotanan cu nan doño tawata laga unda cu ta pa nan destino. E ta un luga cu a wordo yama den bida pa haci’e mas facil pa hendenan por bay laga nan mascotanan indesea atras eynan, enbes di bay purba dwaal nan den mondi y Gobierno ta pone nan drumi. 

 

Semper mester keda tene na cuenta cu ta e doño mes ta hiba nan y hinca nan eyden ora e no kier nan mas. E cacho of pushi no ta drenta di nan propio boluntad den e luga ey.

Local y internacionalmente e actitud di deshaci di un mascota ora e no ta tuti mas, no ta sigui wordo tolera. Bo mascota no ta un obheto, e tambe ta un ser bibo y e tin sentimento.

 

Manera a wordo anuncia caba, un di e prome pasonan di e Plan Nacional ta pa construi un “bewaarplaats” manera ley ta stipula (AB 2012 no. 63). E necesidad pa esaki a wordo treci dilanti den seccion 2 di informacion tocante e Plan Nacional. 

Lo transforma e “killcage” den e “bewaarplaats”. E construccion a tuma luga caba y e comision di accion ta percurando pa cumpli cu condicionan minimo pa cachonan por hospeda eyden, pa e ora e luga aki por wordo inaugura como e “Centro di Control di Cacho” (CCC)

 

Cachonan cu wordo haya riba caya ta haya e chens segun ley, di keda te 3 dia (cacho sin microchip) of te 10 dia (cacho cu microchip) den e CCC wardando nan doño bin busca nan y nan lo tin di paga pa e gastonan pa dia di estadia di e mascota. Si e doño no busca su cacho, e mascota lo por wordo adopta. Euthanasia ta e ultimo recurso. Pa es motibo e doño mester ta consciente, of kisas e lo mester wordo educa, tocante ki responsabilidadnan tur e ta encera ora di scoge pa ta un doño di un mascota.

Cu e inauguracion di e CCC, ta e prome biaha cu un Gobierno ta percura pa e ley di cacho por wordo enforsa pa locual ta trata pone cacho “in bewaring” ora esey ta rekeri.

This site uses Akismet to reduce spam. Learn how your comment data is processed.

error: Content is protected !!
%d bloggers like this: