E akontesimentunan di ayera djarason 24 di yüni a konmové nos tur, sigur ami tambe.

E akontesimentunan di ayera djarason 24 di yüni a konmové nos tur, sigur ami tambe.
Un grupo asina grandi di siudadanonan malkontentu, ku doló, ta un señal kla ku nos komo lidernan di e pais, no ta tresiendo algu klaramente dilanti. Sinembargo mi ta desaprobá  e disturbionan i sakeonan ku a tuma lugá despues di e manifestashon. Ta derecho di un i tur pa protestá, pero esaki mester sosodé di un manera sin violensia. Violensia ta manda un señal robes, no solamente na nos próhimo ku tambe tur ta den mesun situashon, sino tambe na por ehèmpel bishitantenan ku nos ke risibí na nos isla. Ademas, e kiebro di tiendanan ta trese kuné aparte di ku e ta kastigabel, e trabounan di otro personanan na peliger. Esaki a hasi un situashon malu solamente pió. Sinembargo e doló ku e grupo aki ta sinti ta real. P’esei komo lider di partido polítiko MAN, tambe komo Minister di Desaroyo Ekonómiko i miembro di gabinete, lo mi ke,ku plaser, krea un diálogo ku e grupo aki. Un diálogo kaminda e grupo por ekspresá su problemanan i preokupashonnan i kaminda nos por splika e retonan ku Kòrsou ta konfrontá. Solamente sintando na mesa ku otro i ku tur nanishi den mesun direkshon, nos por konstruí e Kòrsou ku nos tur ta soña di dje. Liber, próspero, sigur, trankil i bunita.
Lider políiko di MAN
Steven Martina.

This site uses Akismet to reduce spam. Learn how your comment data is processed.

error: Content is protected !!
%d bloggers like this: