KOMUNIKADO DI KUERPO POLISIAL KÒRSOU Detenshon relashoná ku sakeo
KOMUNIKADO DI PRENSA 246 / 2020
27 yüni 2020
Detenshon relashoná ku sakeo
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ
Djasabra 27 di yüni 2020, reshèrshi a detené un dama relashoná ku sakeo di un negoshi den Otrabanda.
Detenshon di e sospechoso aki, N.A. di 46 aña di edat nase na Kòrsou, a tuma lugá alrededor di 16.35’or den Otrabanda.
Kontinuando ku e investigashon aki, e personal enkargá ku e investigashon a bai na un kas den Javastraat, en buska di un otro sospechoso.
No a topa e persona einan, pero si a konfiská vários artíkulo balioso ku ta importante
pa e investigashon.
Despues di a presentá e sospechoso dilanti di un fiskal ouksiliar, a ordená su enkarselamentu pendiente di mas investigashon.
Polis ke atvertí tur siudadano, pa no kumpra kos hòrtá, debí ku esaki ta kastigabel pa lei.
Den e dianan aki, lo tin diferente persona ta bende kos hòrtá prosedente di e sakeonan ku a tuma lugá durante di e disturbionan tras di lomba.
No kumpra e artíkulonan aki, ya ku bo ta haña bo den problema ku hustisia.
Notifiká polis mesora di manera ku nos por pone man riba esnan ku ta bende kos hòrtá i sakia negoshinan.