‘Team Lon’ ta papia un palabra klá

 

‘Team Lon’ ta papia un palabra klá

 

Willemstad- Kòrsou e lastu dianan aki a konosé un lider hóben den e persona di Shaidrilon ‘Lon’ Mutueel, ku a skohe pa lanta i laga su bos zona kontra inhustisia politikamente. E hóben aki tin un grupo ku a lucha kun’é for di su komienso i ku lo sigui ku e lucha te final. 

“Team Lon” manera nan ta yama nan mes aktualmente, ta un grupo di hóben trahadó ku tambe a wòrdu afektá direktamente i indirektamente dor di medidanan tumá dor di e gobièrnu aktual. Esaki a pone ku nan tambe a lanta i skohe pa ta parti di e lucha aki, mirando ku si ta pueblo ta pone e gobernu kaminda e ta, dikon no ta skucha pueblo su dolor pa kambio e ora ei? 

Ku bista riba esaki, e grupo aki a kuminsá ku nan promé lucha pa yama atenshon di pueblo kual tabata riba Brug Juliana dia 17 yüni 2020. Resientemente dia 24 yüni 2020, e grupo aki pasivamente a skohe pa para kantu di kaya na Post 5, yamando e pueblo pa uni i den e mesun rosea pa yama Promé Minister pa bin skucha nan. A hasi petishon na Promé Minister pa bin skucha nan puntonan di prekupashon komo grupo I tambe di siudadanonan ku a skohe pa sostene e lucha I ku tabata presente riba e dia aki. E grupo aki tabatin un sosten fuerte di e Grupo CHEA (Curacao Heavy Equipment Association) riba e dia menshona. 

Sr. Vrutaal, Presidente di CHEA a deklará na varios okashon ku el a skohe pa sostené e hóbennan aki pa guia nan pa hasi moveshonan korekto. E meta semper tabata i a keda pa bin ku un akshon i trese atenshon di manera pasivo i semper teniendo kuenta ku lei.

Riba e djarason dia 24 último, trahadonan di Selikor a uní ku e lucha di Team Lon i a skohe pa tuma e oportunidat pa kana i bai forti mirando ku nos Promé Minister no a duna kara manera a pidi’é den komienso. Grandi tabata nos sorpresa ora ku nos a tuma nota di e magnitut di interesadonan ku a partisipá na e marcha pasivo. Diferente gruponan di interes a uní nan mes ku Team Lon pa e mesun kousa: papia ku Promé Minister i trese un kambio pa pais. Gran kantidat di hende huntu, tenshon kresiente i e eskoho di Promé Minister pa no bin enfrentá su pueblo i tambe e maneho di kuerpo polisial di e situashon riba tereno di Fòrti, a eskalá di tal indolé ku Lon Mutueel ni si team por a haña e kontròl bèk riba e pueblo presente pa por trese trankilidat. Lamentablemente loke a akontesé despues ta sumamente tristu i di lamentá. I Team Lon no ta para tras di esaki. E dia aki a finalisá lagando e tim desapuntá i tristu na momentu ku e team aki a tuma nota ku Sr. Lon Mutueel a wordu detené. 

E akshonnan ku a sigui i e detenshon di Lon ta algu ku a shòk nan, i nan a skohe pa hala nan mes aden pa sinta i analisá huntu ku nan grupo di sostén riba plannan benidero. Na final di dia, semper nan a para pa manifestashon pasivo.

E silensio di parti di Team Lon a aparentá ku e grupo aki a keda ketu of a halá patras; pero e realidat ta ku nan a wanta un ratu pa hala rosea pero no a stòp! 

Den e tempu di “kietut” aki otro grupo i/of individuonan a skohe pa sali dilanti pa sigui ku e lucha. Nan ta apresiá e inisiativa, pero nan ke trese bon kla dilanti ku nan no ta aseptá ningun reunion i/of enkuentro entre ministernan ku supuesto representantenan di e lucha di Lon, sin ku a tuma kontakto ku e team di Lon pa hiba e kombersashon.

Esaki ta nifiká ku plannan trahá i presentá den prensa dor di individuonan ku a reuní ku Team Lon den pasado, komo sifuera ta den koperashon i ku akuerdo di Team Lon, no ta risibí sostén di Team Lon. E team sostene dor di Lon Mutueel ta pidi enkaresidamente pa stop di mal usá e momentu i plataforma kreá pa kumpli ku interesnan propio i polítika barata. Nan meta ta pa uni pueblo I pues nan ta disponibel pa sinta ku tur grupo ku ta interesá pa karga e lucha huntu ku nan.

Si, nos lucha ta sigui. E lucha original tresé dilanti huntu ku — ‘Lon’ Mutueel ta sigui! Nos ta sigui ku e lucha aki manera originalmente nos a palabrá esaki: di un manera pasivo den kuadro di lei tresiendo e kambio nesesario ku nos Pais Kòrsou i nos Pueblo meresé i tin mester di dje.

Na nos mandatarionan di Pais Kòrsou, nos ta kontentu di mira ku nos lucha a habri porta pa otro hóbennan haña oido serka e diferente lídernan di nos Pais. Sinembargo, na momento ku a presentá e oportunidat aki, nos komo hóben inisiadó di e lucha aki a konta ku e mesun oportunidat ku a keda brindá na otronan. Nos ta sigui spera riba e oportunidat aki.

Por Tuma kontakto hasi Team Lon na teamluchalon@gmail.com.

This site uses Akismet to reduce spam. Learn how your comment data is processed.

error: Content is protected !!
%d bloggers like this: