Prome Minister Evelyn Wever-Croes:  ARUBA TA CONOCE 2 CASO POSITIVO DI COVID-19

 

Prome Minister Evelyn Wever-Croes: 

ARUBA TA CONOCE 2 CASO POSITIVO DI COVID-19

Prome Minister Evelyn Wever-Croes a confirma dialuna mainta durante conferencia di prensa di Gobierno di Aruba cu Aruba a conoce 2 caso positivo di COVID-19 haciendo asina e total di casonan positive na Aruba na 103. E dos personanan aki tawata na Colombia pa cuido medico y a regresa Aruba 2 siman pasa. Nan tur dos tawata den cuarentena y a desaroya e sintomanan den fin di siman aki cu ya tawata casi na final di e 14 dianan. 

Den e caso aki, e proceso di contact tracing y isolacion ta mas facil ya cu tur dos persona tawata den cuarentena caba. Na e momento aki e contact tracing a cuminsa y e famianan tambe ta wordo atendi. Di e 2 personanan aki un ta den bon estado di salud pero e otro si mester di cuido medico. 

“Esaki ta un muestra cu nos mester ta cauteloso cu e virus aki manteniendo distancia social y e regla di higiena pa asina evita e virus aki di sigui plama”, Prome Minister a duna di conoce. 

Premier Wever-Croes a menciona tambe cu e 2 casonan aki no ta un drempel pa cancela e plan strategico pa reapertura di nos frontera. Aruba ta consciente cu unabes e frontera habri, casonan nobo lo bin y Aruba ta prepara pa esaki tambe. 

Prome Minister ta desea e dos personanan aki un pronto recuperacion.

This site uses Akismet to reduce spam. Learn how your comment data is processed.

error: Content is protected !!
%d bloggers like this: