Karta habri di tur detenido di SDKK ku 3 punto di atenshon pa Sr. Isaac Gerstenbluth

Karta habri / Openbrief

Willemstad, 20 di yüli 2020

Na señor Izy Gerstenbluth

Epidemiologo GMN

Tema: 3 punto di atenshon

Promé punto: Na nòmber di detenidonan di SDKK nos kier haña klaridat pa ki motibu abogadonan i famianan no tin akseso liber na detenidonan sera na SDKK no opstante ku ya pa mas ku 2 luna kaba a kita shelter in home i ‘lockdown’ rònt Kòrsou.

Ta un situashon hopi desagradabel ku señor Gerstenbluth ku a duna e liñanan di maneho na Gobièrnu pa e pandemia di Coronavirus pa e teritorio di Kòrsou pero tòg den SDKK ta manehando e ‘guidelines’ totalmente diferente.

1. A indiká ku uso di mondkapjes no ta nesesario na Kòrsou pero den SDKK ta obligá abogadonan bisti esaki anto si nan no bin kuné nan ta wòrdu ninga entrada. Meskos ta konta pa famia.

2. A pone tur kos na normal na Kòrsou bek i hasta awor a habri entrada pa turista hasta sin obligashon di karentena miéntras detenidonan no por wak famia mas di 3 luna kaba.

3. Ta permitiendo 1 miembro di famia drenta kada 2 siman, obligatoriamente ku mondkapje i bishita ta tras di mika pa mei ora siendo ku bishita normalmente ta 3 adulto i 2 mucha kada 2 siman, miéntras eifó tur hende ta topa otro normal, bida nokturno a habri bek, manifestashon pasivo di mas di 100+ hende ta tuma lugá pero den SDKK nos ta den ‘lockdown’ ahinda un ‘verkapt model’ di shelter in home ketu bai na vigor innesesariamente.

Detenidonan a reklamá na tur rekursonan interno ku tin pero ta indiká ku nan ta siguiendo e eksperto den vírus su ‘guidelines’.

Por fabor nos ke haña klaridat riba e tema aki, pakiko Kòrsou ta habri normal bek siendo ku nos komo un poblashon di 540 hende ta topa tur dia e personal di SDKK sin ku nan ta bisti mondkapjes anto ta obligando abogadonan i e 1 miembro di famia ku por bishita pa mei ora detenidonan tras di mika i ku mondkapjes?

Dikon boso a duna òrdu pa nos bishitanan sigui di e forma aki, miéntras eifó tur kos a normalisá?

Di 2 punto: Ademas di esaki nos ke trese na atenshon ku tin un problema ku awa den SDKK, masha hopi detenido ta haña nan ta usa shampu Selsun of Ketosal paso nos ta haña ‘uitslag’ riba kueru di kabes, por fabor hasi kontròlnan nesesario pa determiná si ta awa kontaminá ku bakteria nos ta haña na e otro banda di e ‘leiding’?

Di tres punto: Ta normal for di e punto di salu pa kome desayuno 9:30 òf 10or di mainta i tambe kome almuerso 2:30 pa 3or di atardi tur dia ku un poblashon ku suku i diferente otro iregularidat di nan salu?

Spera di por tuma nota pronto di akshon nan konkreto nos ta keda atento na boso intervenshon den e problema di bishita ku ta indiká ku ta boso a stipulá e reglanan aki i e situashon di awa.

Tur Detenidonan di SDKK

(TUR BLOK)

Cc. Minister di GMN per email kabinetministergmn@gobiernu.cw