Site icon KIKO TA PASANDO NOTISIA I INFORMASHON

Progreso den restrukturashon di ENNIA

Advertisements

Progreso den restrukturashon di ENNIA

Willemstad/Philipsburg – Dia 4 i 6 di yüli 2018, riba petishon di Centrale Bank van Curaçao
en Sint Maarten (CBCS), korte a dekretá un areglo di emergensia riba algun di e kompanianan
di e grupo ENNIA (ENNIA). Meta di e areglo di emergensia ta di yega na un
restrukturashon di ENNIA pa asina restorá su nivel di solvensia, entre otro en bista di e
obligashonnan di término largu ku ENNIA tin ku su aseguradonan. Aki ta sigui un informe
di e pasonan mas resien ku a bin ta tuma relashoná ku esei.
Restrukturashon
Asina ku e areglo di emergensia a drenta na vigor, CBCS, huntu ku ENNIA, a kuminsá
inventarisá tur posibel solushon pa e défisit di solvensia, i a kondusí un estudio di faktibilidat.
Huntu ku su konseheronan, CBCS a inkorporá e opshonnan di mas konkreto i faktibel den
un plan di restrukturashon ku en parti ya ta siendo implementá. Entre otro, algun suma
kuantioso di fondo i invershon ku tabata pará riba kuenta di banko estadounidense ya ta bèk
bou di kontrol di e kompania di seguro. Ademas, tin preparativo andando pa yega na un
struktura nobo pa e grupo, loke lo resultá den mas transparensia i ménos riesgo. Den vários
área, e diferente partinan relevante di ENNIA a bin para mas independientemente di otro i
(kontrali na e situashon ku tabatin promé ku e areglo di emergensia) awor sí tin klaridat
enkuanto e posishon di kapital i e perfil di riesgo real di e kompania asegurador. Den e
periodo benidero, lo sigui riba e mesun trayekto akí pa asina, paso a paso, adaptá e struktura
korporativo di ENNIA i saka ENNIA poulatinamente for di bou di e areglo di emergensia.
E restrukturashon lo kontinuá asta despues ku ENNIA kuminsá sali for di bou di e areglo
di emergensia. Meta di e pasonan akí ta di salvaguardá e interesnan di ENNIA su
aseguradonan i demas akreedornan, i na mes momento garantisá su kontinuidat. Asina ku
por, CBCS lo publiká mas informashon tokante progreso di e proseso di restrukturashon.
Proseso den korte
Na òktober di 2019, ENNIA a entamá un proseso den korte kontra diferente persona, entre
otro Sr. Ansary, ku na opinion di ENNIA i CBCS ta responsabel pa e problemanan grave
ku a presentá na ENNIA. A entamá e proseso akí despues ku un investigashon profundo a
saka na kla ku e problemanan grave na ENNIA tabata debí entre otro na algun retiro ilísito
kuantioso di fondonan ku lo mester a keda na disposishon di e aseguradonan. Meta di e
proseso ta di risibí kompensashon pa mas tantu posibel di e retironan di fondo menshoná,
na interes di e aseguradonan. No por spera un sentensia di hues riba korto plaso. Un proseso
ekstenso manera esaki ta tuma bastante tempu i semper ta eksistí e posibilidat ku un di e
partidonan lo tuma sierto akshon pa retrasá e proseso. E promé fase di e proseso (sitashon
di e personanan demandá) a tuma lugá kaba i ENNIA lo sigui pidi korte pa sigui padilanti
ku e kaso ku determinashon. No ta premirá ku lo mester warda riba resultado di e proseso
den korte promé ku por sigui ku e restrukturashon pa garantisá kontinuidat di ENNIA.
Partisipashon sosial i innovashon
ENNIA tambe ta enfrentá e konsekuensianan di COVID-19. No opstante, ENNIA ta keda
balorá partisipashon sosial i esaki ta konta tambe pa loke ta trata e konsekuensianan di
COVID-19. ENNIA lo sigui monitoriá proyekto di karakter sosial i, semper ku ta posibel,
lo apoyá e tipo di inisiativa ei. Tambe, ENNIA a tuma paso ku lo mester resultá, riba korto
plaso, den mihó servisio na su aseguradonan. Ademas, ENNIA ta sigui traha riba inovashon
riba tereno di e seguronan ku e ta ofresé i riba implementashon di desaroyo teknológiko
nobo den e kuadro ei.
Tim di Maneho
Otro siman, CBCS lo nombra un tim di maneho nobo na ENNIA, enkabesá pa Lesley-Ann

Brodie komo Chief Executive Officer.

Willemstad, 23 di yüli 2020

CENTRALE BANK VAN CURAÇAO EN SINT MAARTEN

 

Exit mobile version