Prosedura asiento di Parlamento

July 27, 2020 REDAKSHON

Na Presidente di Parlamento

Señora A-M. Pauletta

Wilhelminaplein 4

Presente

Willemstad, 27 yüli 2020

Tópiko: Prosedura asiento di Parlamento

Apresiabel señora Pauletta,
Nos a tuma nota ku Parlamento no a kumpli ku tur dokumento pa informá nos tokante di e
proseso ku ta tratando di atendé relashoná ku e tratamentu di kredensialnan pa e asiento den
parlamento di señora Marilyn Alcalá – Wallé pa di e forma ei nos por konstatá ku e asiento ta
liber.
Konforme artíkulo 126 insiso 1 di Kiesreglement Curaçao:
Nos ta pidi pa un kopia di e karta ku Parlamento a manda pa Gobernador notifikando ku
Parlamento a aproba e kredensialnan.
Konforme artikulo 126 insiso 4 di Kiesreglement Curacao:
Nos ta pidi pa un kopia di e karta ku fecha ku a risibi esaki, di Gobernadó indikando ku señora
Alcalá-Wallé no ta huramentá mas.
Nos no a mira e kartanan aki riba e sistema di registro di parlamento, RIS.
Sin e dokumentonan korekto aki, ta imposibel pa un Parlamento komo un organo responsabel
i serio por eherse su trabou sigun reglanan i leinan stipula.
Na ningun momento Movementu Progresivo no a bisa ku nos ke stroba un parlamentario di
tuma su asiento den Parlamento. Es mas, nos ta respetá ku e parlamentario tin derechi riba su
asiento i ku ta pueblo a skohé.
Sinembargo manera nos a kontestá e mensahe di whatsapp di bo persona dia 23 di yüli último,
“first things first”. Esaki komo kontesta riba bo pregunta si nos lo ta presente pa forma kuórem
dia 24 di yüli último
Movementu Progresivo ta para pa un Pais ordená.
Parlamento komo e órgano legislativo sigur no por ta pará riba lei i regla.
Saltando lei i prosedura djis pa hasi kos purá ta trese desorden. Ta hustamente esaki ta loke ta
tumando lugá na e momentunan aki.
Pa trese órden den e desórden ta nifiká ku nos akshonnan mester ta konforme lei i regla
Na e momentu ku a sigui e reglanan i leinan korekto i transparente pa tur enbolbi por konstata
ku e proseduranan a kana na ordu, Parlamento por yega na evalua i posibel aprobá e kredensial
nan di señor Shaheen Elhage konforme prosedura, kumpliendo ku lei i reglanan ku ta rigi nos
pais.
Nos ta spera di risibi e kartanan menshoná promé ku djaluna 27 di yüli, 2020, 8.30am
Atentamente,